वडा कार्यालयसे खेलकुद सामग्री वितरण

पहुरा समाचारदाता
हसुलिया, ९ फागुन । कैलालीके कैलारी गाउँपालिका वडा नम्बर १ के वडा कार्यालयसे उ वडामे रहल आठ गाउँके क्लबहे अँटवार खेलकुद सामग्री वितरण करले बा ।

चालु आर्थिक वर्षके लक्षित वर्ग कार्यक्रम अन्तर्गत वडा कार्यालयसे १० ठो टिमके खेलाडीहे खेलकुद सामग्री वितरण करल हो । गाउँपालिकाके उपाध्यक्ष लक्ष्मी सत्गौंवाके प्रमुख आतिथ्यतामे हुइल खेलकुद सामग्री वितरण कार्यक्रममे उपाध्यक्ष सत्गौंवा ओ वडा अध्यक्ष बालकृष्ण डगौराथारु खेलाडीहुकनहे खेलकुद सामग्री हस्तान्तरण करले रहिट ।

हरेक टिमहे १६ जोर जर्सी, एक/एक वटा फुटबल ओ एक÷एक जोर किपरसे प्रयोग कैना पञ्जा वितरण करल वडा सचिव मञ्जु अधिकारी जानकारी डेली । उहाँ महिला ओ पुरुष खेलाडीहे खेलकुद सामग्री डेहल जनैली । जम्मा १६० जोर जर्सी, १० ठो फुटबल ओ १० जोर पञ्जा वितरण करल बा ।

विशनपुरस्थित गोलघरमे आयोजना हुइल खेल सामग्री वितरण कार्यक्रममे वडा समिति सदस्य, गाउँके भलमन्सा लगायतके उपस्थिति रहल रहे ।