देशभर ३८८ जनहनहे कोरोना पुष्टि
काठमाडौँ, ९ फागुन । पाछेक २४ घण्टामे देशभर ३८८ जनहनमे कोरोना संक्रमण पुष्टि हुइल बा । स्वास्थ्य तथा जनसंख्या मन्त्रालयके अनुसार पाँच हजार २५५ जनहनके पीसीआर परीक्षण करेबर २४७ जाने ओ दुई हजार ९१५ जनहनके एन्टीजेन परीक्षण करेबर १४१ जनहनमे संक्रमण पुष्टि हुइल हो ।
मन्त्रालयके अनुसार कुल आठ हजार १४० जनहनमे परीक्षण करेबर पीसीआर ओ एन्टीजेन सहित ३८८ जनहनमे संक्रमण पुष्टि हुइल बा ।
उहे अवधिमे १२ सय ५ जाने संक्रमणमुक्त हुइल बाटै । संक्रमणमुक्त हुउइया दर ९७.६ प्रतिशत रहल मन्त्रालय जनैले बा ।
मन्त्रालयके अनुसार २४ घण्टामे चार जनहनके मृत्यु हुइल बा । इ सँगे मुलुकमे कोरोनासे मृत्यु हुउइयाके संख्या ११ हजार ९२५ पुगल बा ।
हाल देशभर ११ हजार २८२ जाने सक्रिय संक्रमित रहल बाटै । पाछेक २४ घण्टामे मुलुकमे आठ लाख ७३ हजार ४३८ जाने कोरोनाविरुद्धके खोप लगैले बाटै ।
ओस्टेक, धनगढीस्थित सेती प्रादेशिक अस्पतालके प्रयोगशालामे करल परीक्षणमे थप दुई जनहनमे कोरोना पुष्टि हुइल बा ।
पाछेक २४ घण्टामे ३५ नमुना परीक्षण करेबर दुई जनहनमे संक्रमण पुष्टि हुइल अस्पतालके सूचना अधिकारी दिलीपकुमार श्रेष्ठ जानकारी डेलै ।
हाल अस्पतालमे सात जाने संक्रमित विरामी उपचाररत रहल बाटै । उ मध्ये तीन जनहनके आइसियूमे उपचार हुइटी रहल बा कलेसे एक जनहनके भेन्टिलेटरमे उपचार हुइटी रहल सूचना अधिकारी श्रेष्ठ बटैलै । ओस्टके उहे अवधिमे १ जाने अस्पतालसे डिस्चार्ज हुइबर दुई जाने अस्पतालमे भर्ना हुइल बाटै ।
