भोजमे झगडा होके युवकके मृत्यु
पहुरा समाचारदाता
धनगढी, ९ फागुन । कैलालीमे भोजमे नाचगान कैना क्रममे हुइल विवादसे एक जनहनके ज्यान गैल बा । भजनी नगरपालिका–९ के २५ वर्षीय बसन्त चौधरीके ज्यान गैल हो ।
फागुन ७ गते उहे ठाउँमे भोज हुइटी रहल बेला उहाँउपर मारपिट हुइल रहे । बसन्तसहितके युवा भोजमे संगसंगे नाचगान कैना क्रममे विवाद उत्पन्न होके मारपिट हुइल जिल्ला प्रहरी कार्यालयके प्रवक्ता एवम् प्रहरी नायब उपरीक्षक वेदप्रकाश जोशी जानकारी डेलै ।
मारपिटसे घाहिल बसन्तहे उहे रात नै उपचारके लाग सुखडस्थित घोडाघोडी अस्पतालमे लैगिल रहे । मने, वहाँ उपचार सम्भवन नैहुइलपाछे ८ गते सकारे कोहलपुर रिफर करल रहे । कोहलपुरमे उपचारके क्रममे चौधरीके ज्यान गैल प्रहरी नायब उपरीक्षक जोशी बटैलै ।
घटनामे संलग्न रहल आशंकामे प्रहरी पाँच जनहनहे पक्राउ करले बा । एक जनहनहे घटना हुइल दिन ओ चार जनहनहे सोम्मारके पक्राउ करल प्रहरी नायब उपरीक्षक जोशी जानकारी डेलै । पक्राउ परलहुक्रनके प्रहरी नाउँ खुलैले नैहो । मुद्दा दर्तापाछे उहाँहुक्रनके नाउँ सार्वजनिक कैना जनाइल बा ।
