शारदा सरस्वती ओ हिमालयन ह्वाइट हाउस विजयी

पहुरा समाचारदाता
धनगढी, ९ फागुन । धनगढी मेयर लिटल फ्लावर प्रिमियर लिग–६ अन्तरगत सोम्मारके हुइल दुई खेलमे शारदा सरस्वती दोधारा ओ हिमालयन ह्वाइट हाउस स्कुल काठ्माडौं विजयी हुइल बटै ।

पहिले खेलमे एभरेष्ट एकेडेमी अत्तरियाहे ३३ रनसे पराजित करटी कञ्चनपुरके शारदा सरस्वती दोधारा पहिल जित निकरना सफल हुइल । टस हारके ब्याटिङके निम्ता पाइल शारदा निर्धारित २० ओभरमे ९ विकेट गुमाके १ सय ३३ रन बनाइल । जवाफी ब्याटिङ सुरु करल एभरेष्ट एकेडेमी १९.३ ओभरमे अपन सक्कु विकेट गुमाके १ सय रन केल बनाई सेकल ।

एभरेष्टके लाग योगेश भाट २७ ओ सन्दीप विष्ट १९ रन बनैना बाहेक और ब्याट्सम्यानके प्रदर्शन मजा हुई नइसेकल । बलिङ ओर शारदाके अर्जुन सिंह साउद ४ ओभर बलिङ करटी १४ रन डेके महत्वपूर्ण ४ विकेट लेलै । ओकर मिलन बोहरा २, विकास सुनार, हेमन्त धामी ओ राजेश साउद समान १/१ विकेट लेलै ।

यी आघे शारदाके लाग हेमन्त धामी २५ बलमे २ छक्का ओ ३ चौकासहित अविजित ३८ रनके पारी खेलेबेर अनुराग सिंह २२ बलमे २३ रन बनाके आउट हुइलै । गणेश बिटालु ओ मिलन बोहरासे टिमके लाग समान १४ ओ सुनिल चन्दसे १३ रन बनैलै । बलिङओर एभरेष्टके कृश ऐर ४ ओभरमे ३ महत्वपूर्ण विकेट लेटी ११ रन डेलै । आकाश चन्द ओ धर्म जोशी समान २/२ विकेट लेके गोविन्द विष्ट ओ मुकेश ओझा १÷१ विकेट लेना सफल हुइलै ।

खेलके प्लेयर अफ दी म्याच हेमन्त धामी घोषित हुइलै । सर्वाधिक छक्काके अवार्ड हेमन्त पाके गेमचेन्जर अवार्ड अर्जुन सिंह साउद पैलै ।
सोम्मार हुइल दुसरा खेलमे हिमालयन ह्वाइट हाउस स्कुलसे लगातार टिसरा जित दर्ता करले बा । सैनिक आवासीय महाविद्यालय तेघरीहे ९२ रनसे पराजित करटी हिमालयनसे शानदार जित दर्ता करल हो ।

टस हारके ब्याटिङके निम्ता पाइल हिमालयन ह्वाइट हाउस स्कुलसे निर्धारित २० ओभरमे ७ विकेट गुमाके २ सय ६ रनके विशाल योगफल तयार पारल । २ सय ७ रनके विजयी लक्षसहित मैदान उटरल सैनिक १५.३ ओभरमे अपन सक्कु विकेट गुमाके १ सय १४ रन केल बनाई सेकल । सैनिकके लाग सुरुवाती ब्याट्सम्यान खडक बोहरा ओ प्रज्वल थापा ३.४ ओभरमे ३८ रनके साझेदारी करटी मजा सुरुवाती डेहुवाइल रहिट । ओकरपाछे सम्हारे नइसेकल सैनिकके ब्याट्सम्यानके प्रदर्शनसे लगातार टिसरा हार ब्यहोरे परल । ओकर लाग प्रज्वल थापा ३६, खडक बोहरा २२, कमलेश विष्ट १३ ओ सागर चन्द ११ रन केल बनाई सेकल । बलिङ ओर हिमालयनके दीपक बोहरा(जुनियर)से ४ ओभर बलिङ ओर १ मेडनसहित २० रन डेके महत्वपूर्ण ५ विकेट लेलै । अनुप कुँवर ४ ओ सन्दीप शाही १ विकेट लेलै ।

यी आघे हिमालयनके लाग कप्तान नारायण जोशी ११ छक्का ओ ४ चौकाके मद्दतसे ३२ बलमे ९२ रनके उत्कृष्ट पारी खेल्लै । उहाँहे इनिङके अन्तिम ओभरमे कमलेस विष्ट बोल्ड आउट करले रहिट । हिमालयनके वसन्त सिंह कार्की २९ बलमे ४७, लक्की कडायत ओ एमएस थापा समान १६÷१६, दीपक बोहरा १२ रन बनाके आउट हुईबेर रजत तिमिल्सिना १० रनमे नट आउट रहलै । बलिङ ओर सैनिकके गौतम केसीसे २, कमलेस विष्ट, सैलेश बम, सागर चन्द, खडक बोहरा ओ आकाश चन्द समान १/१ विकेट लेलै ।

खेलके प्लेयर आफ दी म्याच नारायण जोशी घोषित हुईबेर सर्वाधिक छक्काके अवार्डफे उहे पैलै । गेम चेन्जर अवार्ड दीपक बोहरा जुनियर पैलै ।

प्रतियोगिता अन्तर्गत आज मंगररके पहिल खेलमे सकारे ९ः३० बजे लिटल फ्लावर ओ गुरुकुल आमनेसामने हुई कलेसे दुसरा खेलमे दुपहर १ः३० बजे विद्या भूषण ओ स्टेपिङ स्टोन भिरही ।