थारु कविनसे कविता सुनागैल
पहुरा समाचारदाता
धनगढी, १० फागुन । थारु समुदायके थारु कवि लोगन अपन अपन कविता सुनैले बटैं ।
मातृभासा दिवसके मौका पारेके बुक बस नेपालके आयोजनामे १३ जाने थारु कवि इन्टरनेट जूम कार्यक्रमसे कविता सुनाइल हुइँट् ।
कार्यक्रममे कंचनपुरसे प्रकृति पूजा चौधरी, कैलालीसे ईन्दु थारु, सागर कुस्मी संगत, अंकर अन्जान चौधरी, कविता काव्य, दुर्जनकुमार चौधरी, दांगसे विष्णु कुसुम, प्रणव आकाश, यम चौधरी, भूमिका थारु, राजकुमार कान्छ, कोकिला चौधरी, सप्तरीसे सरिता चौधरी लगायत कवि लोग एक एकठो कविता वाचन कैले रहिंट ।
बुक बस के सहकार्यमे कुछ महिना पहिले कविता लेखनके वर्कसप हुइल रहे । ओहे वर्कसपके बाड कवि लोग लेखन अभ्यास कर्टी आइल रहिंट । मातृभासाके अवसरमे कविता वाचन कार्यक्रमके आयोजना करल आयोजक बटाइल ।
कार्यक्रममे सुनाइल सक्कु कविनके कविता इहे सन २०२२ भिट्टर कविता संग्रह प्रकासन कर्ना बुक बा नेपाल जनैले बा ।
कार्यक्रममे आयोजक बगालसे प्रणवमान सिंह, उज्वला महर्जन, सुभानी सिंह सक्कु कविनहे सुभकामना ओ बधाइ डेले रहिंट कलेसे सहजीकरण ईन्दु थारु कैले रहिंट ।
