‘रावलसे पार्टी स्पष्टिकरण पुछी’
पहुरा समाचारदाता
धनगढी, १० फागुन । नेकपा एमालेके केन्द्रीय सदस्य तथा राष्ट्रिय युवा संघके इन्चार्ज महेश बस्नेत पार्टीके निर्णय विपरित संसदमे अपने धारणा राखल कहटी एमाले नेता तथा प्रतिनीधिसभा सदस्य भीम रावलहे स्पष्टिकरण पुछे पर्ना बटैले बटै ।
प्रेस चौतारी नेपाल कैलालीसे मंगरके आयोजना करल पत्रकार सम्मेलनमे बोल्टी बस्नेत संसदके नियम विपरित रावलहे बोले डेहलमे सभामुखसंगफे आपत्ति जनैलै । ‘शुन्य समयमे सांसदसे अपन धारणा राखे पैना व्यवस्था विपरित सभामुखसे भीम रावलहे बोले डेहल बटै,’ बस्नेत कहलै, ‘यी आपत्तीके विषय हो, रावलसेफे पार्टीके निर्णय विपरित संसदमे बोल्ले बटै, यी विषयमे पार्टीके संसदीय दलमेफे गुनासो बा, उहाँहे स्पष्टिकरण पुछे परल ।’
नेता बस्नेत सभामुख दलिय व्यवस्थाके बारेमे जानकार नइरहल आरोप लगैलै । ‘उहाँ गुरिल्ला शासन व्यवस्थाके बारेमे अध्ययन करल जैसिन विल्गाइठ,’ बस्नेत कहलै, ‘उहे व्यवस्था अनुसार उहाँ आघे बढ्े खोज्टै, संसदिय व्यवस्था अनुसार सभामुखके भूमिका निर्वाह कैना उहाँ असफल हुइल बटै ।’
फरक प्रसंगमे बोल्टी बस्नेत प्रचण्ड ओ माधव नेपालके कारण एमसीसी गिजोलल बटैलै । प्रचण्ड ओ माधव नेपालसे संसदमे एक ओ बाहेर एक बोल्टी एमसीसीहे विवादके विषय बनाइल ओइनके कारण एमसीसी अन्तराष्ट्रिय करण हुइल बटैलै ।
‘यहोर फे ठिक्क ओ उहोर फे ठिक्क हुइना प्रचण्ड, नेपालके शैलिके कारण आज नेपाल विवादित बन्न पुगल बा,’ उहाँ कहलै, ‘दुई जानेक कारण नेपालके सार्वभौम सत्ता उप्पर आँच आई लागल बा, यकर जिम्मेवारी ओइने लागे परठ ।’
एमाले गठबन्धन कायम रहटसम एमसीसीके विषयमे कुछ नइबोल्न बटैटी उहाँ गठबन्धन नइरहलेसे अपन धारणा रख्न बटैलै । गठबन्धन कायमे रहल वेला एमालेसे एमसीसी पारित कैना सहयोग नइकैनाफे उहाँ बटैलै ।
इन्चार्ज बस्नेत अइना चुनावमे माओवादीसंग तालमेल हुइना कौनो सम्भावना नइरहल बटैलै । ‘एमालेहे फुटैना ओ अपने सरकार ढालके रमिता डेखैना माओवादीसंग हमार तत्काल कौनो तालमेल नइहुई,’ उहाँ कहलै, ‘प्रचण्डहे एक्लाके छोरबी ।’
