विद्या भूषण सेमिफाइनलमे

पहुरा समाचारदाता
धनगढी, १० फागुन । धनगढी मेयर लिटल फ्लावर प्रिमियर लिग–६ अन्तर्गत मंगरके रोज हुइल दुई खेलमे लिटल फ्लावर स्कुल ओ विद्या भूषण गेटा विजयी हुइल बटैं । विद्या भूषण स्टेपिङ स्टोनहे पराजित कैके सेमिफाइनलमे स्थान पक्का करल बा । विद्या भूषणके जित पाछे लिटल फ्लावर उपाधि होडसे बाहिरल बा ।

ओस्टेक दोसर खेलमे विद्या भूषण गेटा स्टेपिङ स्टोन उप्पर ८७ रनके जित निकारल हो । टस जितके ब्याटिङ करना निर्णय करल विद्या भूषणके अर्जुन साउँद ओ वीरेन्द्र नाथके उत्कृष्ट पारीसँगे निर्धारित २० ओभरमे ७ विकेट गुमाके १ सय ८६ रन बनाइल । १ सय ८७ रनके विजयी लक्ष्य पछ्याइल स्टेपिङ स्टोन १९.१ ओभरमे अपन सब विकेट गुमाके ९९ रनमे किल सीमित हुइल । स्टेपिङके लाग दिनेश ओड ३१, कप्तान अभिषेक कुवर २१, विशाल विष्ट १२ ओ वीरेन्द्र चन्द १० रन बनैलैं ।

ओस्टेक, विद्या भूषणके वीरेन्द्र नाथ ४, रोशन थापा २, अर्जुन साउँद, नरेन साउँद, प्रवेश बुढथापा ओ वीरेन्द्र बम समान १÷१ विकेट लेलैं ।
यीआघे विद्या भूषणके लाग विस्फोटक पारी खेलके अर्जुन साउँद ३८ बलमे ८ छक्का ओ ७ चौकके मद्दतले ८९ रन बनैलैं । सुरुवाती पारी एक्केलि सम्हार वीरेन्द्र नाथ ४७ बलमे ५४ रन बनाके आउट हुइलैं । प्रदीप चन्द १४ रन बनैलैं । ओस्टेक स्टेपिङके कप्तान अभिषेक कुँवर ४ ओ आयुब चन्द १ विकेट गिरैलैं ।

खेलके प्लेयर अफ दी म्याच वीरेन्द्र नाथ घोषित हुइलैं । सर्वाधिक छक्काके अवार्ड अर्जुन साउँद पैलैं कलेसे गेम चेन्जर अवार्ड अर्जुन साउँद पैलैं ।

पहिल खेलमे लम्कीके गुरुकुल स्कुलहे ८ विकेटले पराजित करटि लिटल फ्लावर स्कुल विजयी हुइल । टस जितके ब्याटिङ करना निर्णय करल गुरुकुल १७.५ ओभरमे अपन सब विकेट गुमाके ८५ रनकिल बनाइ सेकल । ८६ रनके सामान्य लक्ष्य पछ्याइल लिटल फ्लावर ५.२ ओभरमे २ विकेट गुमाके लक्ष्य पाइल । लिटल फ्लावरके लाग विपिन रावल उत्कृष्ट अर्धसतकीय पारी खेल्लैं ।

१६ बलमे ५ चौका ओ ४ छक्का प्रहार करल विपिन ५० रनमे अविजित रहलैं । सुवास ऐर ८ बलमे २० ओ प्रकाश जैसी १० रन बनाके आउट हुइलैं । सुवास ओ प्रकाशके विकेट जानु कस्गर लेलैं ।

यीआघे गुरुकुलके लाग कृश शाही ३१ बलमे २२ ओ कुशल न्यौपाने १२ बलमे १० रन बनैना बाहेक अन्य ब्याट्सम्यान दोहरो अंक जोरे नैसेक्लैं । ओस्टेक लिटल फ्लावरके रुपेश थापा ४ ओभर बलिङ करटि १४ रन खर्चके महत्वपूर्ण ५ विकेट लेलैं । ओस्टेक सचिन भट्ट ४ ओभरमे १३ रन डेके ३ विकेट ओ सार्थक बम १ विकेट लेलैं ।

खेलके प्लेयर अफ दी म्याच रुपेश थापा घोषित हुइलैं सर्वाधिक छक्काके अवार्ड विपिन रावल पैलैं कलेसे गेम चेन्जर अवार्ड सचिन भट्ट पैलैं ।

प्रतियोगिता अन्तर्गत काल्ह (बुधके रोज) हुइना पहिले खेलमे शारदा सरस्वती दोधारा ओ सैनिक आवासीय महाविद्यालय तेघरी तथा दोसर खेलमे सत्यवती एकेडेमी अत्तरिया ओ स्टेपिङ स्टोन प्रतिस्पर्धा करहि ।

धनगढी मेयर लिटल फ्लावर प्रिमियर लगके विजेता १ लाख ५० हजार ओ उपविजेता ७५ हजार पुरस्कार राशि पैहिँ ।