हानिकरक अभ्यासके अन्त्य कैना प्रतिवद्धता
पहुरा समाचारदाता
धनगढी,१० फागुन । समाजमे विद्यामान हानिकरक अभ्यासके अन्त्य कैना सरोकारवाला निकायसे प्रतिवद्धता जनैले बटै ।
राष्ट्रिय महिला आयोगसे मंगरके रोज धनगढीमे आयोजित समाजमे विद्यामान हानिकरक अभ्यास (छाउपडी प्रथा, बालविवाह, बहुविवाह, दाइजो प्रथा, तिलक प्रथा, बोक्सी प्रथा, लिङ पहिचान सहितके गर्भपतन विरुद्ध)के सुदूरपश्चिम प्रदेश केन्द्रीत अन्तरक्रिया कार्यक्रममे कैलाली जिल्लाके १३ स्थानीय तहके प्रमुख÷उपप्रमुख, प्रमुख जिल्ला अधिकारी, कैलालीके प्रहरी प्रमुख, महिलाके क्षेत्रमे काम करुइया अगुवाहुक्रे समाजमे विद्यामान हानिकरक अभ्यासके अन्त्य कैना हस्ताक्षर सहिट प्रतिबद्धता जनाइल रहिट ।
कार्यक्रममे कैलालीके प्रमुख जिल्ला अधिकारी किरण थापा सुदूरपश्चिम प्रदेशमे प्रचलनमे रहल हानिकारण अभ्यास ओ ओकर अवस्थाबारे कार्यपत्र प्रस्तुत करल रहिट । कार्यपत्र प्रस्तुत करटी उहाँ आर्थिक बर्ष २०७६/०७७ मे बालविवाहके ५, बहुविवाहके १४, छुवाछुटके ८ बोक्सी आरोपमे कुटपिटके २ मुद्दा दर्ता हुइल बटैलै । आर्थिक बर्ष २०७७/०७८ मे बालविवाहके १०, बहुविवाहके ११०, छुवाछुटके १० बोक्सी आरोपमे कुटपिटके ४ मुद्दा परल ओ आर्थिक बर्ष २०७८/०७९ मे बालविवाहके ४ ओ बहुविवाहके ५५ मुद्दा दर्ता हुइल बटैलै ।
सुदूरपश्चिम प्रदेशमे मानव वेचविखनके अवस्थाबारे जानकारी डेटी आ.व. २०७६/२०७७ मानव वेचविखनके १८, मानव बेचविखन तथा जबरजस्ती करणीक १, अपहरण तथा शरिर बन्धक जबरजस्ती करणीके , बाल यौन दुरुपयोगके ६ मुद्दा दर्ता हुइल प्रजिअ थापा बटैलै । आ.व २०७७/०७ सालमे मानव वेचविखन १४, मानव वेचविखन तथा जबरजस्ती करणीके ११, अपहरण तथा शरिर बन्धक जबरजस्ती करणीके १०, तेजाव प्रयोग करके अंगभंग २, बाल यौन दुरुपयोगके १९ ठो घटना दर्ता हुइल बा ।
आ.व २०७८/०७९ सालमे मानव वेच विखनके २, मानव वेचविखन तथा जबरजस्ती करणीके ४, अपहरण शरिर बन्धक २ ओ बा यौन दुरुपयोगके ४ ठो मुद्दा रहल उहाँ बटैलै । सुदूरपश्चिम प्रदेशमे छाउपडी प्रथा विद्यामान रहल ओरसे छाउ हुइल महिला छाउ गोठमे बैठल बेला अकालमे ज्यान गैल, बलात्कार हुई परल ओ गोठ भत्कैना अभियान करल रहे ।
जेम्ने प्रदेशके नौ जिल्लामे आ.व २०७५/०७६ सालमे १७७, आ.व २०७६/०७७ सालमे ६५६९ ओ आ.व. २०७७/२०७८ सालमे ७९९ छाउ गोठ भत्काइल प्रमुख जिल्ला अधिकारी थापा बटैलै । प्रदेशमे लागु औषधके कारोवारफे मौलाइल कहटी पुरुष संग्गे महिलाफे संलग्न डेखल उहाँ जनैलै ।
ओस्टेक इन्सेक प्रदेश संयोजक खडकराज जोशी सामाजिक कुरिति एवं महिला हिंसाके सवालबारे कार्यपत्र प्रस्तुत करले रहिट । समाजमे विद्यामान हानिकरक अभ्यास (छाउपडी प्रथा, बालविवाह, बहुविवाह, दाइजो प्रथा, तिलक प्रथा, बोक्सी प्रथा, लिङ पहिचान सहितके गर्भपतन विरुद्ध)के अन्त्य कैना अवधारण बनाके आघे बह्रे पर्ना उहाँ जोड डेहल रहिट ।
जिल्ला समन्वय समिति कैलालीके सभाति सुर्य बहादुर थापाके वडका पहुनामे हुइल कार्यक्रममे यहाँके नगर प्रमुख, प्रहरी प्रमुख, नगर उपप्रमुख, महिला अधिकारके क्षेत्रमे काम करुइया अधिकारकर्मी लगायत मन्तव्य व्यक्त करले रहिट । राष्ट्रिय महिला आयोगके सदस्य जया घिमिरेके अध्यक्षतामे हुइल कार्यक्रममे स्वागत मन्तव्य आयोगके उपसचिव चर्मिला भट्टराई करले रहिट ।
