कठायत प्यानलसे १७ बुँदे चुवानी घोषणापत्र जारी
पहुरा समाचारदाता
धनगढी, १२ फागुन । नवजीवन सहकारी संस्थाके २८ औँ वार्षिक साधारण सभाके तयारी तीव्र पारल बा । साधारण सभा मार्फत लावा कार्यसमिति समेत चयन हुइना हुइल ओरसे चुनावी सरगर्मी समेत बह्रल बा । लावा नेतृत्वके लाग रतन बहादुर कठायत ओ देवबहादुर बमके प्यानल चुनावी मैदानमे उत्रल बावै । इहे बिच बिफेक रोज धनगढीमे पत्रकार सम्मेलनके आयोजना कैटी कठायत प्यानल घोषणा कैटी आपन १७ बुँदे चुनावी घोषणापत्र फेन सार्वजनिक करले बा ।
‘हमार समृद्धि, हमार एकतासे सम्भव बा, दिगो विकास लक्ष्य प्राप्तिके लाग सहकारी’ कना मूल नारा सहित चुवावी मैदानमे होमल कठायत प्यानलसे नवजीवनहे पूर्ण प्रविधीमैत्री बनाके नवजीवन कल सेन्टके स्थापना कैके सहकारीके सदस्य तथा गैरसदस्यहे निःशूल्क संस्थासे प्रदान करजैना सेवा सुविधाके जानकारी ओ सक्कु सेवा केन्द्रमे एटिएम सेवा विस्तार कैनाके साथे क्यूआर पेमेन्ट सेवाहे विस्तार करजैना प्राथमिकतामे राखल बा ।
ओस्टके उहाँ नवजीवन बीमा कार्यक्रम सुरु कैके सहकारीके सदस्यहे १ लाखसे ५ लाखसमके स्वास्थ्य बिमा ओ प्रत्येक सेवा केन्द्र लग्गे रहल निजी तथा सामुदायिक अस्पतालस समन्वय कैके सहकारीके सदस्यहे औषधी उपचार, स्वास्थ्य जाँचमे विशेष छुटके व्यवस्था लगायत नवजीवन सहकारी अस्पतालके अवधारणाके लाग योजना निर्माण कैना जनाइल बा ।
उहाँ कृषके लाग बैज्ञानिक कषि उत्पादन, बजारीकरण ओ उचित मुल्य डेहुवाइना ओ सहुलियत ब्याजदरमे ऋण प्रवाह करजैना, लघुविक्त कार्यक्रमहे लघुउद्दमसंग समन्वय कैके प्रत्येक सेवा केन्द्रमे सुपथ मुल्यमा पसल खोल्न, कृषि लघुउद्यम मार्फत उत्पादित बस्तुहे बजार प्रवद्र्धन कैना लगायत घोषाण्पत्रमे उल्लेख रहल बा ।
ओस्टके कम्तिमे ३ सेवा केन्द्रहे पायक पर्ना मेरके ३ ठो नवजीवन स्कूल क्यापसके स्थापना कैके उ मार्फत सहकारीके सदस्यके बालबालिकाहे उच्च माध्यमिक तहसम सुलभ तरिकासे अध्ययनके व्यवस्था मिलैना ओ नवजीवन शिक्षा पदकहे आउर विद्यार्थीमुखी, विद्यार्थीमैत्री बनाके नवजीवन संग विद्यार्थी कार्यक्रम सुरु कैना उल्लेख करल बा ।
ओस्टके प्रत्येक बरस कम्तिमे १ सय जाने सदस्यहे राष्ट्रिय तथा अन्तराष्ट्रिय स्तरके सकारी भ्रमणके व्यवस्था, कर्मचारीके वृति विकासके लाग आवश्यक तालिम, उत्प्रेणाके कार्यक्रम, कर्मचारी सापटीहे विमासं आवद्ध कैके कर्मचारी जीवन सुरक्षामे ध्यान डेना, ४ बरसमे संस्थाके १२ ठो लावा सेवाकेन्द्रके स्थापना कैना जनाइल बा ।
साथे हाल सहकारी ऐनसे सदस्यहे प्रदान कैना लाभांश दर १८ प्रतिशत बाहेक संरक्षित पुँजी फिर्ता कोष मार्फत सदस्यहे कारोबारके योगदानमे आधारित रहिके वार्षिक पुँजी फिर्ता कैना, युवा तथा साना स्वरोजगार कोष तथा अन्य सकारी तथा दातृ निकायसंग समन्वय कैके कृषक सदस्य, उद्यमी सदस्यहे सहुलियत दरमे कर्जा डेना, गोदावरी नगरपालिका स्थित रहल संस्थाके बिउबिजन भण्डारण केन्द्रहे कृषक सदस्यके उत्पादन भण्डारण ओ बजारीकरण, संस्थामे प्रवेश करुइया लावा कर्मचारीहे शेयर सदस्यके सन्ततिहे प्राथमिकता, संस्था स्थापनाकालके शेयर सदस्य एवं ७० बरससे उप्परके सदस्यहे प्रत्यक्ष आर्थिक, सामाजिक, धार्मिक तथा पर्यटकीय लाभ हुइना क्रियाकलाप करजैना उल्लेख करले बाटै ।
ओहकान प्यानलमे उपाध्यक्षमे चेतराज ओझा ओ सदस्यमे क्रमशः उत्तम जोशी, उपेन्द्र विष्ट, केशवराज मिश्र, कृष्ण बहादुर चौधरी, गणेश बम, गोपीलाल चौधरी, जयराज जोशी, पूर्णराज जोशी, भीम बहादुर बलायर, राधिका कुमारी चौधरी ओ रोम स्वाँर रहल बाटै । लेखा सुपरीवेक्षक संयोजक चेतराज जोशी ओ सदस्यमे लक्ष्मीराज पन्त ओ सीता विक रहल बाटै ।
इहीसे आघे बुधके देव बहादुर बम आपन नेतृत्वमे प्यानल घोषणा कैसेकल बाटै । नवजीवन सहकारी संस्था २०५० सालमे ९ जाने शेयर सदस्यसे सुरु करल हो । हाल संस्थामे झन्डे ३० हजार शेयर सदस्य रहल बाटै ।
संस्थामे हाल १० ठो सेवाकेन्द्र सञ्चालनमे रहल ओ हाल ४ अर्ब १२ करोड बचत संकलन कैके टमान व्यवसायीक तथा उत्पादनमूलक क्षेत्रमे करिब ३ अर्ब ७० करोड कर्जा लगानी करल जनाइल बा ।
संस्थामे हाल २६ करोड २४ लाख चुक्ता शेयर पुँजी रहल ओ टमान जगेडा कोषमे करिब ३८ करोड रकम जम्मा होके ६४ करोडके पुँजी कोष कायम करल जनाइल बा । संस्थाके लावा कार्यसमिति चयनके लाग इहे फागुन २८ गते निर्वाचन हुइ जैटी रहल बा ।
