ह्वाइट हाउस, शारदा, सत्यवती ओ विद्या भूषण सेमीफाइनलमे
पहुरा समाचारदाता
धनगढी, १२ फागुन । धनगढी मेयर लिटल फ्लार प्रिमियर लिग–६ विद्यालय स्तरीय यु–१९ राष्ट्रिय क्रिकेट प्रतियोगिताके सेमीफाइनल समिकरण पुरा हुइल बा । विफेक रोज हुइल समूह चरणके अन्तिम खेलमे काठ्ण्माडौँके हिमालयन ह्वाइट हाउस स्कुल होलिल्याण्ड स्कुल अत्तरियाहे पराजित करलसंगे प्रतियोगितामे सेमिफइनल यात्रा तय कैना चार टिमके अन्तिम टुंगो लागल हो ।
समूह ‘ए’ से जिटे पर्ना खेलमे ह्वाइट हाउससंग ८० रनसे पराजित हुइलसंगे होलिल्याण्ड उपाधि होडसे बाहिरेबेर शारदा सरस्वती दोधाराहे फाइदा पुगल बा । शारदा रन रेटमे होलिल्याण्ड ओ एभरेस्ट एकेडेमीहे पाछे परटी सेमीफाइनल प्रवेश करले बा । शारदा सम्मिलित समूहसे ह्वाइट हाउस समूह विजेता बनके ८ अंकसहित सेमिफाइनलमे पुगल बा । शारदाके ४ अंक बा ।
समूह ‘बी’ से विद्या भूषणहे रन रेटमे पाछे परटी सत्यवती समूह विजेता बनके सेमीफइलन पुगेबेर विद्या भूषण समूह उप–विजेता बनके सेमीफइनल पुगल बा । दुनु टिमके अंक भर समान ६/६ रहल बा ।
समूह चरणके जिटे पर्ना अन्तिम खेलमे होलिल्याण्ड अत्तरीयासे ह्वाइट हाउससंग ८० रनके हार ब्यहोरल । टस हारके ब्याटिङके निम्टा पाइल हिमालयन ह्वाइट हाउस स्कुल काठमाण्डौँसे निर्धारित २० ओभरमे ५ विकेट गुमाके १ सय ९६ रन बनाइल रहे । १ सय ९७ रनके विशाल विजयी लक्ष पछ्याइल होलिल्याण्डसे १५.२ ओभरमे अपन सक्कु विकेट गुमाके १ सय १६ रन केल बनाई सेकल । ओकर राज विश्वकर्मा २७ बलमे ३०, दीपक टमाटा १३ बलमे २२ ओ अभिषेक पाल ७ बलमे १९ रन बनैना बाहेक और ब्याट्म्यानके प्रदर्शन सम्झनलायक बने नइसेकल ।
होलिल्याण्डहे सस्तामे समेट्न बलिङओर हिमालयनके वसन्तसिंह कार्की महत्वपूर्ण ४, राहुल भण्डारी ओ सतिश यादव समान २÷२ तथा सार्थक धितालसे १ विकेट लेलै ।
यहोर आघे हिमालयनके लाग दीपक बोहराके जोडीसे ५७ बलमे ९६ रनके उत्कृष्ट साझेदारी करटी हिमालयनहे मजा सुरुवात डेहुवाइल । ९.३ ओभरमे पहिल विकेट गुमाइल हिमालयनके लाग दीपक बोहरा (जुनियर) से ४९ बलमे ५ छक्का ओ ८ चौकाके मद्दतसे ८७ रनके उत्कृष्ट पारी खेल्लै । ओकर राहुल भण्डारी १५ बलमे २९, नारायण जोशी ९ बलमे २७, दीपक बोहरा (सिनियर) २७ बलमे २१ रन बनैलै ।
बलिङ ओर होलिल्याण्डके जीत साउद ३ ओ गजेन्द्र बोहरा १ विकेट लेलै ।
खेलके प्लेयर अफ दी म्याच दिपक बोहरा(जुनियर) घोषित हुइलै । गेम चेन्जर अवार्ड वशन्त सिंह कार्की पाईबेर, सर्वाधिक छक्काके अवार्ड दिपक बोहरा(जुनियर) पैलै ।
शुुक हुइना सेमीफइनलके पहिल खेलमे बिहान ९ः३० बजे ह्वाइट हाउस ओ विद्या भूषण तथा दुसरा सेमिफइनल खेलमे दुपहर १ः३० बजे सत्यवती ओ शारदा भीरही ।
प्रतियोगिताके विजेता १ लाख ५० हजार ओ उप–विजेता ७५ हजार नगदसहित ट्रफि, मेडल ओ प्रमाणपत्र प्राप्त करही । ओस्टेक प्रतियोगिताके उत्कृस्ट खेलाडी २० हजार रुप्या, उत्कृस्ट ब्याट्सम्यान ओ बलर समान १० हजार रुप्या प्राप्त करही ।
