एमसीसी सम्झौता खारेजीके माग करटी प्रदर्शन
पहुरा समाचारदाता
धनगढी, १२ फागुन । एमसीसी सम्झौता खारेजीके माग करटी धनगढीमे प्रदर्शन करल बा । धनगढीमे ८ कम्युनिष्ट पार्टीसे एमसीसीविरुद्ध प्रदर्शन करल हुइट ।
एमसीसीके विरोधमे नेकपा माओवादी केन्द्रके सक्कु जनवर्गीय संगठनके आयोजनामे अमेरिकी सहायता परियोजना एमसीसीके विरोधमे धनगढीमेफे प्रदर्शन हुइल हो ।
धनगढीके मुख्य सडकमे एमसीसी लागू करे नइहुइना कहटी टमान नारासहित प्रदर्शन करटी जिल्ला प्रशासन कार्यालय आघे पुगके कोणसभा करल रहे । कोणसभाहे सम्बोधन करटी नेकपा माओवादी केन्द्रके केन्द्रीय सदस्य देवकी मल्ल एमसीसी परियोजना लागु कैना नाउँमे अमेरिका नेपालमे कब्जा जमाई खोजल आरोप लगैली । उहाँ कहली, यिहीसे पहिले केपी ओली जबरजस्ती एमसीसी पास करेखोजलपाछे गठबन्धन टुटल हो ।
ओस्टेक कोण सभाहे सम्बोधन करटी माओवादी केन्द्रके नेता रमेश धामी एमसीसी राष्ट्रघाती परियोजना रहल कहटी कौनोफे हालतमे संसदसे पास नइहुइना दाबी करलै । उहाँ अब्बेक सत्ता गठबन्धनके एजेण्डा एमसीसी नइरहल, केपी शर्मा ओलीके दम्भ टुरेक लाग सत्ता गठबन्धन बनल बटैलै । कोणसभाहे सम्बोधन करटी टमान जनवर्गीय संगठनके प्रतिनिधिसेफे एमसीसी देशके हितमे नइरहल ओरसे फिर्ता पठाई पर्ना बटैले बटै ।
माओवादी केन्द्र ओ एकीकृत समाजवादी, नेमकिपा, जनमोर्चा, राप्रपालगायतके टमान पार्टीके कार्यकर्ता देशभर प्रदर्शन करटी आइल बटै । ओस्टेक विफेक बैठना कहल प्रतिनिधि सभाके बैठक स्थगित हुइल बा । सरकारके आग्रहमे स्थगित करल सभामुख अग्निप्रसाद सापकोटाके सचिवालय जनैले बा । प्रधानमन्त्री शेरबहादुर देउवासे करलपाछे शुकसमके लाग बैठक स्थगित करल बा । गैल अँटवार प्रतिनिधि सभा बैठकमे एमसीसी प्रस्तुत करल रहे । बैठक आज दुपहर १ बजेके लाग बोलाइल बा ।
