डिफेन्डिङ च्याम्पियन ह्वाइट हाउसहे पराजित कैके विद्या भूषण फाइनलमे
पहुरा समाचारदाता
धनगढी, १३ फागुन । डिफेन्डिङ च्याम्पियन हिमालयन ह्वाइट हाउस स्कुल काठमाडौंहे पराजित कैके विद्या भूषण पब्लिक स्कुल गेटा धनगढी मेयर लिटल फ्लावर प्रिमियर लिगके फाइनलमे प्रवेश करले बा ।
धनगढीस्थित प्रदेश प्रहरी कार्यालयके खेल मैदानमे सम्पन्न पहिल सेमिफाइनल खेलमे विद्या भूषण ह्वाइट हाउस उप्पर ६ विकेटके रोमाञ्चक जित दर्ता करल हो ।
टस जिटके ब्याटिङ करना निर्णय करल हिमालयन ह्वाइट हाउस निर्धारित २० ओभरमे ८ विकेट गुमाके १ सय ७४ रनके चुनौतीपूर्ण लक्ष प्रस्तुत करले रहे । १ सय ७५ रनके विजयी लक्ष पछ्याइल विद्या भूषण १० बल बाँकीमे ४ विकेट गुमाके लक्ष भेट्टाइल ।
विद्या भूषणहे फाइनलमे पुगैना कप्तान शेर मल्ल ओ वीरेन्द्र नाथ ९६ रनके उत्कृष्ट अविजित साझेदारी करलैं । नाथ ४१ बलमे ३ चौका ओ ७ छक्काके मद्दत ७३ ओ मल्ल ३० बलमे ५ चौका ओ ४ छक्काके मद्दत ५७ रनके विस्फोटक पारी खेल्लैं । ११.२ ओभरमे ७९ रन बनाके ४ विकेट गुमाके विद्या भूषणके कप्तान मल्ल १७ औँ ओभरमे २७ रन प्रहार करटि टिमहे रोमाञ्चक जित डेलैं । १७ औँ ओभरमे विद्या भूषणके पोल्टामे २९ रन आइल । ओकर प्रदीप चन्द १७ रन बनैलैं ।
बलिङओर हिमालयनके दीपक बोहरा(जुनियर) २ ओ सन्दीप शाही १ विकेट लेलैं ।
यीआघे हिमालयनके लाग लक्की कडायत ४१ बलमे ४ चौका ओ १ छक्काके मद्दतसे सर्वाधिक ४७ रन बनैलैं । दीपक बोहरा (जुनियर) ओ राहुल भण्डारी टिमहे समान २५/२५ रनके योगदान डेलैं । ओकर दीपक बोहरा (सिनियर) २३ रन बनैलैं कलेसे नारायण जोशी १७ ओ रजत तिमिल्सिना १५ रन बनैलैं ।
बलिङओर विद्या भूषणके कप्तान शेर मल्ल, वीरेन्द्र नाथ ओ प्रदीप चन्द समान २/२ तथा अर्जुन साउँद ओ नरेन साउँद १/१ विकेट लेलैं । खेलके प्लेयर अफ दी म्याच शेर मल्ल घोषित हुइलैं ।
सत्यवती ओ शारदा सरस्वतीके बीच काल्ह (शनिच्चरके रोज) हुइना कहल दोसरसेमिफाइनल खेल वर्षाके कारण अवरुद्ध हुइल बा ।
