एक महिनामे १७ जाने पक्राउ

पहुरा समाचारदाता
धनगढी, १४ फागुन । कैलाली जिल्ला लागुऔषध करोवारके ट्रान्जिप्ट पोइन्ट बन्टी गैल बा । यी जिल्ला भारतिय सीमानाकासे जोरल कारण लागुऔषध करोवार हुइटी रहल विल्गाइल हो । नेपालसे लागु औषध चरेश बाहेर लैजैना ओ भारतसे लाग औषध ट्याब्लेट नाईट्रोभेट, स्पास ओ खैरो हिरोईन नन्टी रहल डेखल बा ।

यिहे गैल माघ १४ गतेसे फागुन १३ गतेसमके जिल्ला प्रहरी कार्यालय कैलालीके तथ्याङक हेरेबेर एक महिनामे लागु औषध करोवारमे संलग्न केल १७ जाने पक्राउ परल बटै । पक्राउ परुइयामे एक महिलासहित ७० बरसके बृद्धा समेट रहल जिल्ला प्रहरी कार्यालय जनैले बा ।

माघ १६ गते कैलाली धनगढी उप–महानगरपालिका ४ बोराडाँडी बैठना बर्ष ४१ के गौरी सिंह महरा पक्राउ परल रहिट । हुकहिनहे कैलाली जिल्ला अदालतके आदेशसे लागु औषध चरेश मुद्दामे १७ दिन कैद फैसला सुनैले रहे । मने फरार प्रतिवादी महराहे अस्थायी प्रहरी पोष्ट चटकपुर से खटल प्रहरी टोली पक्राउ करके आवश्यक कारवाहीके लाग जिल्ला अदालत कैलालीमे बुझाइल रहे ।

माघ १९ गते कैलाली धनगढी उपमहानगरपालिका ३ बैठना वर्ष २२ के विशाल थापाहे प्रहरी पक्राउ करल रहे । जिल्ला अदालतके २०७६ अगहन १० गतेक फैसलासे लागु औषध मुद्दामे ६ महिना कैद सजाय तोकलपाछे उहाँ फरार रहिट । थापाहे अस्थायी प्रहरी पोष्ट चटकपुरसे खटल प्रहरी टोली धनगढी–२ एभरेष्ट बैंक लग्गेसे पक्राउ करल रहे ।

माघ २२ गते बझाङ साविक खिरातडी गाविस ७ घर रहल हाल जिल्ला कैलाली गौरीगंगा नगरपालिका वडा नं. ८ चमारीपुर बैठना वर्ष ५३ के मानबहादुर धामी ओ बर्ष ३० के बिर्ख धामीहे पक्राउ करल रहे । जिल्ला प्रहरी कार्यालय, कैलालीसे खटल प्रहरी टोली कैलाली गौरीगंगा नगरपालिका वडा नं. १० उदासिपुरस्थित भित्री सडकखण्डमे ओइनहे लागू औषध चरेश ४ किलो ५०० ग्राम) सहित ओइने प्रयोग करल से.२ प.४११५ नम्बरके मोटरसाईकल समेत बरामद करल रहे ।

माघ २७ गते कैलाली धनगढी उपमहानगरपालिका ३ बैठना बर्ष २० के सुरेन्द्र कोली, प्रकाश विक ओ एकेन्द्र बिष्ट लागु औषधसहित पक्राउ परल बटै । धनगढी उपमहानगरपालिका ३ शहिद गेटस्थित शहिद गेटसे बोराडाडी ओर जैटी रहल ६८६ नम्बरके अटो चालक जिल्ला कैलाली धनगढी उपमहानगरपालिका ३ बैठना एकेन्द्र बिष्टसे चलैटी रहल अटोहे अस्थायी प्रहरी पोष्ट चटकपुरसे खटल प्रहरी टोली शंका लागके चेकजाँच करेबेर अटो चालकके सिट टरे नुकाई छिपाई धारल अवस्थामे ८८ ट्याब्लेट नाईट्रोभेट ओ २८ ट्याब्लेट स्पाससहित उहे अटोमे सवार सुरेन्द्र ओ प्रकाशहे पक्राउ करल रहे ।

फागुन १ गते ईलाका प्रहरी कार्यालय भजनी कैलाली लागु औषध (खैरो हिरोईन) सहित ३ जनहनहे भजनी नगरपालिका ६ महादेउलीसे पक्राउ करल रहे । कैलाली बर्दगोरिया गापा १ बैठना वर्ष २४ के रोहित खडकासे चलाइल से.३ प.९४० नम्बरके मोटरसाइकल पाछे बैठल भजनी–६ बैठना बर्ष २० के अन्जान डंगौराहे चेक जाँँच करेबेर हुकान थेनसे खैरो हिरोईन ५ ग्राम फेला पारल रहे । ओइन संगे संलग्न रहल भजनी–१ बैठना बर्ष २२ के अर्जुन चौधरी समेतहे ईलाका प्रहरी कार्यालय भजनी कैलाली नियन्त्रणमे लेके थप अनुसन्धान करटी रहल बा ।

फागुन १ गते लागु औषध चरेशसहित १ जाने महिला पक्राउ परल बटै । जिल्ला प्रहरी कार्यालय कैलाली गौरीगंगा न.पा. ४ बैठना बर्ष २६ के देउमती साउदहे लागु औषध चरेश सहित पक्राउ करल रहे । हुकहिनहे धनगढी उपमहानगरपालिका ४ बसपार्क एरियासे १२ ग्राम लागु औषध चरेश सहित करल रहे ।

फागुन ७ गते लागु औषध खैरो हिरोईनसहित २ जाने पक्राउ परलैं । कैलाली लम्की चुहा नगरपालिका वडा न.०३ चिसापानी नयाँबस्ती बैठना बर्ष २२ के बिरेन्द्र बिष्ट ओ बर्ष २८ के राज सुनार लागु औषध(खैरो हिरोईन) बिक्रि बितरणके लाग पुडिया (पोका) बनाई रहल अवस्थामे पक्राउ परल रहिट । ओइन थेनसे पोका पारल प्लास्टीक, धागा सहित १२ ग्राम ९८० मिलिग्राम ओ प्लास्टिक हटाई तौल करेबेर ९ ग्राम १५० मिलिग्राम लागु औषध (खैरो हिरोईन) सहित पक्राउ करल रहे ।

फागुन ९ गते कैलाली लम्की–चुहा नगरपालिका वडा नं. ०१ लम्की बैठना बर्ष २३ के राजु चौधरीहे हुकाने घरसे ५ पुडीया प्लाष्टिक सहित तौल करेबेर ५५० मिलिग्राम ओ प्लाष्टिक बाहेक तौल करेबेर ३०० मिलिग्राम लागु औषध (खैरो हिरोईन) सहित पक्राउ करल रहे ।

फागुन ९ गते कैलाली लम्की–चुहा नगरपालिका वडा नं. ०८ गप्का बैठना बर्ष ३९ के गोपी ओखेडा लागु औषध (खैरो हिरोईन) सहिट पक्राउ परल रहिट । हुकान घर पसलसे प्लाष्टिक सहित तौल करेबेर ४ ग्राम ओ प्लाष्टिक बाहेक तौल करेबेर ३ ग्राम ३६० मिलिग्राम लागु औषध (खैरो हिरोईन) भेटल रहे । हुकानथेनसे प्रहरी पचास हजार पाँच सय तीस रुप्या, टमान कम्पनीके मोबाइल ५ ठो, घडी पाँच ठो, कैंची एक ठो ओ तौल कैना डिटल काटा १ ठो बरामद करले रहे ।

फागुन १२ गते तालुक सुदूरपश्चिम प्रदेश प्रहरी कार्यालय धनगढी ओ जिल्ला प्रहरी कार्यालसे खटल संयुक्त प्रहरी टोली जिल्ला कैलाली चुरे गा.पा.५ लिसबेली बैठना बर्ष ७० के आईते जाग्रीके घर खान तलासी करेबेर १२ पोका करिया प्लाष्टिकमे बेरल अवस्थामे लागु औषध (चरेस) प्लाष्टिक सहित तौल करेबेर १३ किलो फेला पारके रितपुर्वक बरामद करल रहे ।

ओस्टेक फागुन १२ गते कैलाली धनगढी उपमहानगरपालिका वडा नं. ३ मिलन चोक, प्रगतीटोलस्थित डेरा कैके बैठना प्रेमा चौधरीके कोठामे वडा–२ सन्तोषी टोल बैठना बर्ष ३१ के मनोज जोशी ३ ग्राम लागु औषध (खैरो हिरोईन) सहित पक्राउ परल बटै ।

सुदूरपश्चिम प्रदेश प्रहरी कार्यालयक तथ्याङक अनुसार ६ महिनामे प्रदेश भर २ सय ५२ जाने लागु औषध कारोवारमे संलग्न पक्राउ परलमे कैलालीके १ सय २ ओ कञ्चनपुरके १ सय ३१ जाने रहल बटै । जेम्ने डोटीके १, दार्चुलाके ४, डडेल्धुराके ३ ओ बाजुराके ६ जाने रहल बटै कलेसे अछाम ओ बैतडीमे कोईफे लागु औषध कारोवारमे संलग्न नइडेखल हो । ओम्ने मन्से ९ जाने महिला रहल बटै कलेसे २ सय ४३ पुरुष बटै । उमेर समुह हेरेबेर २० से २९ बरसके सबसे १ सय ६३ जाने, ३० से ३९ बरसके ५३ जाने, ४० से उप्परके १९ ओ १० से १९ बरससम १८ जाने रहल बटै ।

जिल्ला प्रहरी कार्यालय कैलालीके प्रमुख विश्व अधिकारी गोप्य सूचनाके आधारमे लागु औषध कारोवारमे संलग्नहुकन नियन्त्रणमे लेके कार्वाही आघे बह्राइल बटैलै । यूवाहुक्रे लागु औषधके दुव्र्यसनीमे फस्टी गैल ओरसे यिहीहे नियन्त्रण करेक लाग अभिभावकफे जिम्मेवार बने पर्ना बटैलै । लागु औषधके दुव्र्यसनी रोकेक लाग प्रहरी विद्यालयमे जनचेतनामुलक कार्यक्रम करटी रहल प्रहरी प्रमुख अधिकारी बटै ।