धनगढी मेयर लिटल फ्लावर प्रिमियर लिगके उपाधि सत्यवतीहे
पहुरा समाचारदाता
धनगढी, १४ फागुन । विद्याभुषण पब्लिक स्कुल गेटा कैलालीहे १ सय ६१ रनके विशाल अन्तरले पराजित कैटि सत्यवती एकेडेमी अत्तरिया छैठौं संस्करणके धनगढी मेयर लिटल फ्लावर प्रिमियर लिग अन्डर–१९ स्कुलस्तरीय क्रिकेट प्रतियोगिताके उपाधि पहिलचो जिट्ले बा ।
उपाधिसहित सत्यवती एकेडेमी एक लाख पचास हजार रुपैयाँ तथा उपविजेता विद्याभुषण पचहत्तर हजार रुपैयाँ प्राप्त करल ।
धनगढीस्थित प्रदेश प्रहरी कार्यालयके खेल मैदानमे हुइल फाइनलमे सत्यवती एकेडेमीसे डेहल २५१ रनके विशाल लक्ष्य पछ्यैना क्रममे विद्याभुषण १२.१ ओभरमे ८९ रन किल बनाइ सेकल ।
लक्ष्य पछ्यैना क्रममे विद्याभुषणके नुरेन बिस्ट सर्वाधिक ३१ रन तथा प्रशान्त थापा १३ रन बनैना बाहेक अन्य ब्याटर दोहोरो अंकमे रन बनाइ नैसेक्लैं । सत्यवती एकेडेमीके बलिंगमे युवराज खत्री ओ निरज भट्ट समान तिन विकेट तथा सन्तोष कार्की ओ सुजन गौतम समान दुई विकेट लेलैं ।
यीआघे टस जिटके ब्याटिंग करल सत्यवती एकेडेमी २० ओभरमे ४ विकेटके क्षतिमे २५० रन बनैले रहे ।
सत्यवतीके ब्याटिंगमे अन्डर–१९ राष्ट्रिय क्रिकेटर समेत रहल ओपनर सन्तोष कार्की सर्वाधिक ९८ रन बनैलै जोन क्रममे उहाँ ४५ बलमे ३ चौका ओ ११ छक्का प्रहार करलैं । ओस्टेक खगेन्द्र जोशी ८३ रन बनैना क्रममे ५१ बलमे १० चौका ओ ३ छक्का प्रहार करलैं । आदील अन्सारी १२ बलमे २ चौका ओ ३ छक्काके मद्दतले अविजित ३५ तथा सुजन गौतम ५ बलमे ३ छक्का मद्दतले १९ रनके योगदान डेलैं ।
सन्तोष कार्की ओ खगेन्द्र जोशी १८० रनके ओपनिंग साझेदारी करलैं जोन प्रतियोगिताके उच्च साझेदारी हो । चौंथो विकेटके लाग आदील अन्सारी ओ सुजन गौतम ५३ रनके साझेदारी करलैं ।
विद्या भुषणके बलर प्रदीप चन्द तीन विकेट तथा वीरेन्द्र नाथ एक विकेट लेलैं । महँगा सावित हुइल टिम कप्तान शेर ४ ओभर बलिंग कैके ७९ रन खरचके विकेट विहिन रलैं ।
प्रतियोगिताके उत्कृस्ट खेलाडी सत्यवती एकेडेमीके सन्तोष कार्की चुन्लैं । उहाँ २० हजार रुपैयाँ प्राप्त करलैं । ओस्टेक, उत्कृस्ट ब्याट्सम्यान विद्या भुषणके वीरेन्द्र नाथ तथा उत्कृस्ट बलर हिमालयन व्हाइट हाउसके दीपक बोहरा घोषित हुइलैं । उहाँहुक्रे जनही दश हजार रुपैयाँ प्राप्त करलैं । ओस्टेक, उदयमान खेलाडी सत्यवती एकेडेमीके युवराज खत्री चुन्लैं उहाँ १० हजार रुपैयाँ प्राप्त करलैं ।
फागुन २ गतेसे सुरु हुइल प्रतियोगितामे दश टोलीके सहभागिता रहे ।
