कैलारीहे विभेदमुक्त गाउँपालिका घोषणा
पहुरा समाचारदाता
हसुलिया, १४ फागुन । कैलालीके कैलारी गाउँपालिकाहे जातीय छुवाछुत ओ भेदभावमुक्त गाउँपालिका घोषणा करल बा ।
थारु बहुल उ गाउँपालिकामे करिब ९० प्रतिशत जातीय छुवाछुत नइरहल एक अध्ययनसे पुष्टि करलपाछे शनिच्चर एक समारोहकेबीच जातीय छुवाछुत तथा विभेदमुक्त गाउँपालिका घोषणा करल हो । उ गाउँपालिकाके नौ वडाके टमान आठ क्षेत्रमे जातीय छुवाछुत ओ विभेदके बारेमे अध्ययन करल रहे ।
उ अध्ययनसे सामुदायिक पूर्वाधार क्षेत्रमे ९७ प्रतिशत, आर्थिक पूर्वाधार क्षेत्रमे ९८ प्रतिशत, धार्मिक क्षेत्रमे ६१ प्रतिशत, स्रोत सम्पदामे ६९ प्रतिशत विभेद नइरहल डेखल बा । ओस्टेक करके, सरकारी सेवा प्रदायक संस्थामे ९४ प्रतिशत, सामाजिक संघसंस्था ओ समूहमे ८४ प्रतिशत, संस्कृति ओ सम्बन्धमे ७१ प्रतिशत ओ निजी स्थानमे ८० प्रतिशत विभेद नइरहल अध्ययन डेखैले बा । समग्रमे ९० प्रतिशत छुवाछुत नइरहल पुष्टि हुइलपाछे गाउँपालिकाहे जातीय छुवाछुत ओ विभेदमुक्त गाउँपालिका घोषणा करल हो ।
गाउँपालिकाके उपाध्यक्ष लक्ष्मी सत्गौंवाके अध्यक्षतामे हुइल कार्यक्रममे वडका पहुना रहल प्रदेशसभा सदस्य वीरमान चौधरी विभेदमुक्त गाउँपालिका घोषणा हुइना बहुट मजा काम रहल बटैलै । उहाँ विभेदके अन्त्य नइहुइटसम नेपाली जनतासे सोंचल नेपाल नइबन्ना उल्लेख करलै । ‘विभेदसे ढेर क्षेत्रहे प्रभावित कैना करठ, उहाँ कहलै । ‘यकर अन्त्य नइहुइटसम हम्रे सोंचल नेपाल नइबनी ।’ दलित हुइल कारण विभेद कैना परिपाटीके अन्त्य अभिनसम नइहुइल उल्लेख प्रदेशसभा सदस्य चौधरी करलै । ‘अभिनफे कुछ मनैनके कुकुरहे पठरिम अपनसंगे सुटैठै । मने, दलितहे अपन घरेम पैठे नइडेठै’ उहाँ कहलै ।
ओस्टेक, कैलारी गाउँपालिकाके अध्यक्ष लाजुराम चौधरी विभेदमुक्त गाउँपालिका घोषणाकेल नइहुके योजनाफे रहल बटैलै । उहाँ साक्षर गाउँपालिका घोषणा करेबेर कतिपयसे खिल्ली उडाइल जिकिर करटी कहलैे–‘विभेदमुक्त गाउँपालिका घोषणा करबेर ढेर जे विरोध कहरी । मने, यी बुझ्नाहे श्रीखण्ड ओ नइबुझ्नाहे खुर्पाके बिँड हो ।’
अध्यक्ष चौधरी यी घोषणा चुनावके लाग चुनावके लाग नइरहल स्पष्ट परलै । ‘चुनावके लाग हम्रे यहाँ कहुीहे बोलाइल नइहुई । हम्रे २०७४ सालसे गाउँपालिका विभेदमुक्त हुई परी कहिके ढेर अभियान चलाके आज घोषणा कैना सफल हुइल बटी, उहाँ कहलै ।
दुई वर्ष आघे गाउँपालिकाहे विभेदमुक्त घोषणा कैना प्रयास करलेसेफे कोरोना महामारीके कारण घोषणा करे नइसेकल अध्यक्ष चौधरी बटैलै । उहाँ कैलारी गाउँपालिकाभिटर समाजवादके अर्जुन दृष्टि से रहल उल्लेख करटी आब कैलारीमे कुछफे केक्रो उप्पर विभेद करे नइपैना बटैलै ।
‘अब यहाँ बसाइँसराइँ करके अइना व्यक्ति वडामे मै विभेद नइकरल कहिके प्रतिवद्धता जनाइलपाछे केल यहाँ बैठे पैठै, उहाँ कहलै । ‘यदि, कोई अटेर करके विभेद करी कलेसे सब जाने मिलके दण्डित करे परठ ।’ उहाँ एक जातिसे कौनो दुसर जातिहे कौनोफे नाममे विभेद करे नइहुइना बटैलै ।
कार्यक्रममे दलित महिला अधिकार मञ्चके अध्यक्ष सावित्रा घिमिरे विभेदमुक्त गाउँपालिका घोषणा करके कैलारी गाउँपालिकासे नमूना काम करल बटैली । उहाँ गाउँपालिकामे अभिनफे कुछ हद्सम विभेद कायम रहल गाउँपालिकासे कानून बनाके उहीहे न्यूनीकरण कैना विश्वास व्यक्त करली ।
कार्यक्रममे जनता समाजवादी पार्टीके केन्द्रीय सदस्य होरीलाल चौधरी, माओवादी केन्द्रके दीपक सुनार, एमालेके कलेसु चौधरी, कैलारी उद्योग वाणिज्य संघके अध्यक्ष नेपालु चौधरी लगायत बोलल रहिट ।
कैलारी गाउँपालिकाके सामाजिक विकास शाखा प्रमुख यगम कलेल सञ्चालन करके कार्यक्रममे सक्कु वडाके वडाध्यक्ष, गाउँपालिकाके कर्मचारी, दलित समुदायके अगुवा, सर्वसाधारण लगायतके उपस्थिति रहल रहे । कैलारी गाउँपालिकाहे यी आघे साक्षर गाउँपालिका घोषणा करल रहे ।
