कैलालीमे काँग्रेसके त्रिपक्षीय प्रतिस्पर्धा
पहुरा समाचारदाता
धनगढी, १४ फागुन । नेपाली काँग्रेस कैलालीके नयाँ नेतृत्व चयनके लाग त्रिपक्षीय प्रतिस्पर्धा हुइना हुइल बा । संस्थापन पक्षसे दुई ओ काँग्रेस भित्तरके डा. शेखर कोइराला समूहसे एक प्यानल चुनावी मैदानमे उत्रल हो ।
जिल्ला अधिवेश अन्तर्गत शनिच्चरके रोज मनोनयन दर्ता हुइलमे जिल्ला सभापतिमे तीन जहनके उम्मेदवारी परल निर्वाचन समिति जानकारी डेले बा । संस्थापन पक्षके नारायणदत्त भट्ट ओ प्रकाशबहादुर बम तथा कोइराला पक्षसे रामबहादुर कलेलके उम्मेदवारी परल बा ।
यीआघे सभापतिमे दाबी करटि आइल नेता भीम बडुवाल पाछे हटलबाद त्रिपक्षीय प्रतिस्पार्धा हुइना हुइल हो । उहाँ संस्थापन पक्षसे सभापतिके उम्मेदवार नारायणदत्त भट्टके प्यानलसे उपसभापतिमे उम्मदेवारी डेले बटैं । उहाँक प्यानलसे उपसभापतिमे रामप्रसाद चौधरी, सचिवमे केशव मिश्र ओ अमृत बिसी, सहसचिवमे रामसमझ राना ओ कलेसु चौधरी उम्मेदवारी डेले बटैं ।
ओस्टेक, बम प्यानलसे उपसभापतिमे खेमराज चौधरी ओ तेजशंकर भट्ट, सचिवमे नृप सुनार, थर्क शाह, सहसचिवमे कृष्ण पाण्डेय ओ राजेन्द्र खड्काके उम्मेदवारी परल बा । कोइराला पक्षसे उपसभापतिमे यज्ञनिधि कोइराला ओ लोकराज पाण्डेय ‘आगो’, सचिवमे देवानन्द जैशी ओ नवराज जोशी, सहसचिवमे रवीन्द्रप्रताप सिंह ओ तीर्थराज जोशीके उम्मेदवारी परल बा ।
संस्थापन पक्षके दुई ठो प्यानल हुइलपाछे नेताहुक्रे दुई खेमामे बटल बटैं । संस्थापन पक्षके दुई हजार ढेर मतदाता बटैं । पहिल चरणमे संस्थापन पक्षके बम ओ भट्ट आघे अइना आंकलन करल बा । प्रधानमन्त्री एवं पार्टी सभापति शेरबहादुर देउवा जिल्ला नेतृत्वके लाग उम्मेदवारमध्ये केक्रो नाम नैडेलैं । मने, देउवा पत्नी आरुजु राणा भर जनआन्दोलनके घाहिल भट्टहे पार्टी सभापति बनैनामे जोड करल काँग्रेस निकट स्रोत जनैले बा । नेता एनपी साउँदके समर्थन फेन भट्टहे बा ।
कांग्रेसके १४ औं महाधिवेशनसे निर्वाचित कैलालीके ६ जाने केन्द्रीय सदस्यमध्ये अधिकांशके समर्थन भट्टके पक्षमे खुलल ओरसे उहाँ बलगर उम्मेदवारके रूपमे देखापरल फेन कुछके बुझाइ बा ।
प्रदेश सभापति वीरबहादुर बलयार फेन भट्टके पक्षमे बटैं । कैलालीके जिल्ला निर्वाचनमे नेता एनपी साउँद ओ रमेश लेखकके औरेऔरे उम्मेदवार होके संस्थापन पक्षभित्तर सहमति हुइ नैसेकल कांग्रेसीहुकनके कहाइ बा ।
प्रदेश महामन्त्री शाह रमेश लेखक पक्षधर रहल ओरसे कैलालीके निर्वाचन फेन विभाजन हुइल टमानके बुझाई बा । सभापतिमे उम्मेद्वारी डेहल नारामण भट्टके पक्षमे धनगढी उपमहानगरपालिकाके मेयर तथा काँग्रेसके केन्द्रीय सदस्य नृपबहादुर वड, उपमेयर तथा केन्द्रीय सदस्य सुशीला मिश्र भट्ट, केन्द्रीय सदस्य जीवन राना, ईश्वरी न्यौपाने, डा. रणबहादुर रावल लगायत खुलल बटैं ।
राष्ट्रिय सभा सदस्यमे विजयी नारायणदत्त मिश्र फेन भट्टके पक्षमे डेखाइल बटैं । उहाँ काँग्रेस भित्तर पौडेल पक्ष मानजैठैं । भट्टके पक्षमे प्रदेश सभा सदस्य टेकबहादुर रैका, पूर्व क्षेत्रीय सभापति हरिश खड्का, धनगढी नगर सभापति यज्ञराज उपाध्याय, क्षेत्र नम्बर ४ के सभापति बसन्त रोकाया लगायत बटैं ।
काँग्रेस सुदूरपश्चिमके महामन्त्री तथा दुईठो कैलाली जिल्ला सभापति होसेकल वर्तमान सुदूरपश्चिम प्रदेश महासचिव नरनारायण शाह ‘मनु’ के कैलालीमे प्रभाव बलगर रहल बा । शाह कलैं, जिल्ला सभापतिमे प्रकाशबहादुर बमहे आघे सारल हो । कैलाली क्षेत्र नम्बर ५ पार्टी सभापति शेरबहादुर देउवा पत्नी आरजुके निर्वाचन क्षेत्र फेन रहल ओरसे चासोके साथ हेरल बा ।
कैलालीमे कोइराला समूहके भोटर संख्या फेन टमान कम बा । टबेमारे संस्थापन पक्षके नेताहुकन बीच प्रतिस्पार्धा हुइना डेखाइठ । जिल्ला कार्यसमितिके निर्वाचनमे २ हजार ५७२ मतदाता रहल निर्वाचन समिति जानकारी डेले बा ।
कांग्रेस सम्बद्ध स्रोतके अनुसार मतदाता क्षेत्रीय प्रतिनिधिमध्ये पाँच सयके हाराहारीमे किल कोइराला पक्षके मतदाता बटैं । कोइराला समूहओर चन्द्रसिंह भट्टराई ओ पूर्वपार्टी सभापति गोविन्दराज जोशीके पहलमे उम्मेदवारी दर्ता हुइल हो ।
काल्ह (अँट्वार) बिहान ८ बजेसे ४ बजेसम मतदान हुइना कार्यक्रम रहल बा ।
