संसदसे एमसीसी सम्झौता अनुमोदन
पहुरा समाचारदाता
काठमाडौं, १५ फागुन । संसदसे कौनो फे सैन्य गठबन्धनमे आवद्ध नइहुइना घोषणासंगे अमेरिकी सहयोग परियोजना मिलेनियन च्यालेन्ज कम्प्याक्ट (एमसीसी) अनुमोदन करले बा ।
अँटवार बैठल प्रतिनिधिसभाके दुसरा बैठकमे अर्थमन्त्री जनार्दन शर्मा एमसीसी सम्झौताबारे उठल प्रश्नहे समेटके १२ बुँदे व्याख्यात्मक घोषणा प्रस्ताव करल रहिट, जिहीहे संसदसे एमसीसीसंगे अनुमोदन करले बा ।
नेपालसे करल १२ बुँदे घोषणा व्याख्यात्मक घोषणामे मिलेनियन च्यालेन्ज कम्प्याक्टके पक्ष हुइल कारण नेपाल, अमेरिकाके हिन्द प्रशान्त रणाीति लगायतके कौनोफे सामरिक, सैन्य वा सुरक्षा गठबन्धनमे आवद्ध हुइल नइमानजाई कना घोषणा करल बा ।
नेपालके संविधान, कम्प्याक्ट ओ कम्प्याक्टसंग सम्बन्धित और सम्झौतासे उप्पर रहल, एमसीसी अनुदानके प्रयोग बाहेक और कौनोफे उद्देश्यके लाग अमेरिकी कानून वा नीतिके पालना कैना नेपाल बाध्य नइहुइना, एमसीए–नेपालके सक्कु क्रियाकलाप तथा कोषके लेखा परीक्षण महालेखा परीक्षकसे कैना ओ वौद्धिक सम्पत्ति नेपालके स्वामित्व रहना घोषणा करल बा ।
व्याख्यात्मक घोषणामे एमसीसीके क्रियाकलाप/कार्यक्रम सञ्चालन करेबेर नेपालके कानून वा नीति उल्लंघन हुइलमे ३० दिनके पूर्व लिखित पूर्वसूचना डेके कम्प्याक्ट अन्त्य करे पैना अधिकार रहना समेत उल्लेख बा ।
ओस्टेक करके प्रतिनिधि सभाके बैठक फागुन १८ गतेसम स्थगित हुइल बा । एमसीसी सम्झौता अनुमोदन हुइलसंगे सभामुख अग्नि सापकोटा बैठक फागुन १८ गतेसम स्थगित करल हुइट । अँटवार दुई ठो बैठक बैठल रहे । दुसरा बैठकसे अमेरिकी सहयोग सम्झौता मिलेनियम च्यालेन्ज कर्पोरेशन (एमसीसी) ओ ओकर उप्परके व्याख्यात्मक घोषणा अनुमोदन करल रहे ।
