सभापतिके लाग दुसरा चरणके मतदान हुइना
पहुरा समाचारदाता
धनगढी, १६ फागुन । नेपाली काँग्रेस कैलालीमे लौवा नेतृत्व छनौटके लाग हुइल मतदानमे सभापतिमे उम्मेदवारहुक्रे पाँच प्रतिशत पुगाई नइसेकलपाछे दुसरा चरणके मतदान हुइना डेखल बा ।
पहिल चरणके मतगणनाअनुसार सभापतिके उम्मेदवार प्रकाशबहादुर बम सबसे ढेर ११६९ मत पैले बटै । सभापतिके दुसर उम्मेदवार नारायणदत्त भट्ट १०७२ ओ रामबहादुर कलेल १९७ मत पैले बटै । पहिल चरणके मतदानमे २ हजार ४८५ जाने प्रतिनिधि मत डरले रहिट । डारल मत मन्से सभापति पदमे जिटेक लाग एक जाने कम्तीमेफे एक हजार २४३ मत नाने पर्ना रहे । मने, तीनु जाने ५० प्रतिशतसे कम मत प्राप्त करल निर्वाचन अधिकृत टेकप्रसाद सुवेदी बटैलै । पहिल चरणमे कौनोफे उम्मेदवारसे ५० प्रतिशतसे ढेर मत नाने नइसेकलपाछे आब दुसरा चरणमे मतदान हुइना उहाँ बटैलै ।
सभापति पदके लाग आब बम ओ भट्टबीच प्रतिस्पर्धा हुई । दुनु जाने संस्थापन पक्षके हुइट । सबसे कम मत नानल संस्थापन इतर पक्षके कलेल सभापति पद्के होडसे बाहिरल बटै । निर्वाचन सुवेदीके अनुसार पहिल चरणमे सभापति निर्वाचित हुई नसेकलपाछे यिहे फागुन १८ गते दुसरा चरणमे निर्वाचन कैना तयारी हुइटी रहल जनैलै । मतगणना सकारे १० बजेसे कहलेसेफे दुपहर २ बजेसे केल मतगणना सुरु कैल रहे ।
अब्बे सभापतिके उम्मेदवारहुकन मतगणना हुइल रहे कलेसे और जानेक मतगणना बाँकी बा । कैलाली क्षेत्र नम्बर १ से ४५८ मत परलमे १५ मत बदर, क्षेत्र नम्बर २ से ४६९ मत परलमे ९ मत बदर, क्षेत्र नम्बर ३ से ४८३ मत परलमे ९ मत बदर, क्षेत्र नम्बर ४ से ५४८ मत परलमे ८ मत बदर ओ क्षेत्र नम्बर ५ से ५२८ मत परलमे ७ मत बदर हुइल बा । २४ सय ३८ मत परलमे कुल मत मन्से ४८ मत बदर हुइल निर्वाचन अधिकृत सुवेदी बटैली ।
