माओवादी केन्द्र सुदूरपश्चिम अध्यक्षमे उत्सव विजयी
पहुरा समाचारदाता
धनगढी, १७ फागुन । नेकपा (माओवादी केन्द्र) सुदूरपश्चिम प्रदेश समिति अध्यक्षमे हरिराम चौधरी ‘उत्सव’ सर्वाधिक मतसे विजयी हुइल बाटै ।
सोम्मारके हुइल मतदानमे उहाँ अध्यक्षके औरे प्रत्यासी उम्मेदवार समेत रहल सुदूरपश्चिम सरकारके वन वातावरण तथा पर्यटन मन्त्री मानबहादुर धामीहे पराजित कैटी विजयी हुइल हुइट ।
माओवादी केन्द्रके प्रदेश सहइन्चार्ज वीरमान चौधरीके अनुसार राष्ट्रिय सभा सदस्य समेत रहल उत्सव ११४ मत लानल रहिट कलेसे धामी ९३ मत प्राप्त करल रहिट ।
उपाध्यक्षमे क्रममा मानबहादुर माल १२४, रणबहादुर बुढा १०१ ओ अक्कल रावल १०० मत लानके विजयी हुइल रहिट । ३ जाने उपाध्यक्षके लाग ७ जाने उम्मेदवारी डेहल रहिट । उपाध्यक्ष आकांक्षी प्रेम प्रकाश भट्ट ८८, दुर्गा बडुवाल ३५, लोकबहादुर बोहरा ७२ ओ मीनबहादुर घर्तिमगर ५६ मतमे सीमित होके पराजित हुइल हुइट ।
सचिवमे जनक सिंह बुढा विजयी हुइल बाटै । उहाँ सचिवके औरे उम्मेदवार अमर सिंह चौधरीहे पराजित कैटी विजयी हुइल हुइट । बुढा १६४ मत प्राप्त करले बाटै कलेसे चौधरी ३८ मतमे सीमित हुइल रहिट ।
सहसचिवमे क्रममे नन्दबहादुर साँउद १५७, रामबहादुर देउकर १४६ ओ अंजिता श्रेष्ठ १०८ मत लानके विजयी हुइल बाटै । ३ जाने सहसचिवके लाग ५ जाने उम्मेदवारी डेहल रहिट ।
ओस्टके, कोषाध्यक्षमे कमल कुमारी शाह शाही विजयी हुइल बाटी । शाही ११३ मत लानल रही कलेसे ओहकान निकटतम प्रतिद्वन्द्वी विनिता बिक ८४ मत किल लानल रही ।
जम्मा २१० मत मध्ये २१६ मत गिरल निर्वाचन समिति जनैले बा । प्रदेश सम्मेलन उद्घाटन हुइल झण्डे ३ महिना हुइ लागल रलेसे फेन पदाधिकारी टुंगो लागे नैसेकल रहे । सम्मेलन अगहन २५ ओ २६ गते तोकल रहे । मने पदाधिकारीमे टुंगो लागे नैसेकके चुनावी प्रक्रियामे गैल हो ।
