ग्याल्पो ल्होसारमे सार्वजनिक विदा
काठमाडौं, १८ फागुन । सरकारसे फागुन १९ गतेके ग्याल्पो ल्होसारके लाग सार्वजनिक विदा डेना निर्णय करले बा ।
मन्त्रिपरिषद्के फागुन १६ गतेके बैठकसे सार्वजनिक विदा डेना निर्णय करल हो । गृह मन्त्रालयके सूचना अधिकारी वसन्त भट्टराईसे जारी करल विज्ञप्तिमे कहल बा, ‘ ‘फागुन १९ गते बिफेक रोज ग्याल्पो ल्होसारके उपलक्ष्यमे नेपाल राज्यभरके सक्कु सरकारी कार्यालय, सार्वजनिक संघस्थामे सार्वजनिक विदा डेना’ मन्त्रिपरिषद्के मिति २०७८/११/१६ मे निर्णय हुइल ओरसे सम्बन्धित सक्कु जनहनके जानकारीके लाग इ सूचना प्रकाशित करल बा ।’
सरकारसे सक्कु खाले ल्होसारमे बिदा डेटी आइल बा । ग्याल्पो लोसार बौद्ध धर्मावलम्बीहुक्रनके एक प्रमुख चाड हो । इ चाड खास कैके शेर्पा जाति मनैना हुइले फेन सांस्कृतिक घुलमिलके कारण अन्य जाति फेन मनैना करठै ।
लावा बरसके रूपमे शेर्पा समुदाय ग्याल्पो ल्होसार मनैना करल बाटै । मुस, गैया, बाघ, नम्हा, ड्रागन (मेघ), साप, घोडवा, भेडवा, बाँदर, चिँरै, कुक्कुर ओ बराह कैके १२ वर्गमे ग्याल्पो ल्होसारहे विभाजन करल बा ।
