फागुन १९ गतेसे सुदूरपश्चिम खप्तड गोल्डकप प्रतियोगिता
पहुरा समाचारदाता
धनगढी, १८ फागुन । मुख्यमन्त्री सुदूरपश्चिम खप्तड गोल्डकपके तयारी पूरा हुइल बा । फागुन १९ गतेसे हुइना प्रतियोगिताके सक्कु तयारी पुरा हुइल आयोजक सुदूरपश्चिम–११ स्पोर्टस क्लव जनैले बा ।
प्रतियोगिता फागुन २८ गतेसम सञ्चालन हुइना बावै । क्लवके अध्यक्ष सुरेश हमाल मैदान तयार पारल बटैटी प्रतियोगितामे सहभागी हुइना टोली फेन धनगढी पुगल जानकारी डेलै । ओस्टके प्रतियोगिताके ट्रफी फेन सार्वजनिक करल बा ।
बिफेक रोज धनगढी रंगशालामे हुइना प्रतियोगिताके उद्धघाटन खेलमे मनाङ मर्स्याङ्दी क्लव ओ भारतके दिल्ली फुटबल क्लव प्रतिस्पर्धा हुइना हुइल बा । प्रतियोगितामे १० टिमके सहभागिता रहना जनाइल बा । आयोजक सुदूरपश्चिम–११ सहित मनाङ, दिल्ली, हिमालयन शेर्पा क्लब, एनजेजेवाईसी फुटबल क्लब, क्यामरुनके एभेनिर फुटबल क्लब, फ्रेन्ड्स क्लब, बागमती युथ क्लब, न्यूरोड टिम ओ मछिन्द्र फुटबल क्लव रहल बावै ।
नकआउटके आधारमे खेलाजैना प्रतियोगिताके विजेता २१ लाख नगद प्राप्त कैना बाटै । उपविजेता टोली १० लाख नगद प्राप्त कैना बाटै ।
सर्वोत्कृष्ट खेलाडी मोटरसाइकल पैना बाटै कलेसे उत्कृष्ट गोलरक्षक, डिफेन्डर, फरवार्ड, सर्वाधिक गोलकर्ता ओ प्रशिक्षक सहित उदयमान खेलाडी ओ फेयर प्ले टिम जनही नगद २५ हजार प्राप्त कैना बाटै ।
