प्रचण्ड ओ माधव एमसीसीके विषयमे कार्यकर्ताहे भ्रममे परलैः पोखरेल
पहुरा समाचारदाता
धनगढी, १९ फागुन । नेकपा (एमाले)के महासचिव शंकर पोखरेल नेकपा (माओवादी केन्द्र)के अध्यक्ष पुष्पकमल दाहाल ‘प्रचण्ड’ ओ नेकपा (एकीकृत समाजवादी)के अध्यक्ष माधवकुमार नेपाल एमसीसीके विषयमे कार्यकर्ताहे भ्रममे पारके स्वार्थके रोटी सेक्ना काम करल अरोप लगैले बाटै ।
बिफेक रोज धनगढीमे आयोजित कार्यक्रममे उहाँ पहिले एमसीसी राष्ट्रघाती रहल बटाइल ओ अब्बे व्याख्यात्मक घोषणाके नाउँमे कार्यकर्ताहे मूर्ख बनाइल उहाँके कहाइ बा ।
व्याख्यात्मक घोषणा कहलक ज्या कहल बा उहे स्पष्ट पर्ना । ज्या हो उहे हो । काल्ह गलत रहे, आज सही हो कहिके हुइ ? उहाँहुक्रे कहे परल काल्ह नै बुझ्ले रही । बुद्धिजीवीहुक्रे व्याख्यात्मक घोषणा करलपाछे छ्याङ्ङ हुइली,” उहाँ कहलै ।
प्रचण्ड ओ नेपाल तत्कालीन नेकपा कालमे अध्यक्ष केपी शर्मा ओली एमसीसी पारित कैके राष्ट्रघाती काम करे लागल आरोप लगैटी पार्टी विभाजनके आधार बनाइल मने अब्बे उहे सम्झौता पारित कैना सहयोगी बनल पोखरेल बटैलै । हाल प्रचण्ड ओ नेपाल गलत साबित हुइल कहटी उहाँ सँगे गैल नेता–कार्यकर्ताहे फेन एमालेमे अइना आग्रह समेत करलै ।
“अब माधव नेपालओर गैल संघरियाहुक्रे या प्रचण्ड ओर गैल संघरियाहुक्रे आब बुझ्ना बेला हुइल । नेकपाके अन्तरसंघर्षमे उहाँ ज्या पोजिसन रख्ले रहिट, उ पोजिसनके अन्त्य हुइल । उहाँहुक्रे गलत साबित हुइलै । नेकपा एमाले अर्थात् केपी ओलीके नेतृत्वमे हम्रे रख्टी आइल अडान सही साबित हुइल बावै । उहे अर्थमे अपनेहुक्रे आइ परल । वहाँ रहे पर्ना जरुरी नैहो । आइ, हम्रे मिलके बलगर पार्टी निर्माण करी ।”
