धनगढी उपमहानगरके मेयरके लाग गोपाल हमालसे उम्मेदवारी घोषणा

पहुरा समाचारदाता
धनगढी, १९ फागुन । व्यवसायी गोपाल हमाल धनगढी उपमहानगरपालिकाके मेयर पदके लाग उम्मेदवारी घोषणा करले बटैं ।

सुन्दर सुदूरपश्चिमके अभियान्ता समेत रहल हमाल बिफेक रोज धनगढीमे घोषणा सभा आयोजना कैटी अइना वैशाख ३० गते हुइना स्थानीय तहके निर्वाचनमे उपमहानगरके मेयर पदके लाग स्वतन्त्र रुपमे उम्मेदवारी डेना घोषणा करल हुइट । विवेकशील साझा पार्टीके सुदूरपश्चिम प्रदेश संयोजक पदसे कुछ दिन आघे उहाँ राजीनामा डेहल रहिट ।

२०७४ सालके स्थानीय तह निर्वाचनमे फेन स्वतन्त्र उम्मेदवारी डेहल हमाल नेपाली कांग्रेसके नृपबहादुर वडसँग पराजित हुइल रहिट । ‘२०७४ सालके चुनावमे हम्रे डुसरा स्थान हासिल कैलेसे फेन मै उहीहे पहिल नै मन्ले बाटुँु,’ घोषणा सभाहे सम्बोधन कैटी हमाल कहलै, ‘मै चार बरस धनगढीके विकासके लाग योजना बनैनामे बिटैले बाटुँ । ढिउर राजनीतिक दल मेयरके टिकट डेब कलेसे फेन मै धनगढी नगरवासीके साझा उम्मेदवारके रुपमे उम्मेदवारी डेबु ।’

उहाँ आघेक निर्वाचनमे ढिला कैके चुनाव चिह्न पाइल तथा उपमहानगरपालिका कतिपय क्षेत्र नयाँ रहल ओरसे पराजय व्यहोरे परल उल्लेख कैटी आपनहे नैहोके धनगढीहे जिटैना आहृवान समेत करलै ।

अपने चुनाव जिटलपाछे कौनो मेरके लाभ नै लेना ओ भ्रष्टाचारहे नियन्त्रण कैना दाबी ओहकान रहल बा । ‘मै साझा व्यक्तिके रुपमे रहल ओरसे सक्कु जनहनहे न्याय करम । मेयरके लाभ नैलेम कनाके अर्थ भ्रष्टाचार हुइ नैडेबु, बेथिति हुइ नैडेबु, भ्रष्टाचार प्रवृत्तिहे कल्याणकारी प्रवृत्तिमे परिणत करम,’ हमाल कहलै ।

उहाँ धनगढीके विकास अब्बेक लाग नैहोके ५० बरस पाछेक लाग हुइना मेरके योजना सञ्चालन कैना प्रतिबद्ध रहल उल्लेख कैटी निर्वाचनमे सक्कु जनहनहे सहयोग कैना आग्रह करले बाटै ।

हमालसँगे अन्य चार जाने फेन स्वतन्त्र उम्मेदवारके रुपमे वडाध्यक्षमे उम्मेदवारी घोषणा करले बाटै ।

धनगढी उपमहानगरपालिका–४ के वडाध्यक्षमे सिद्धराज पनेरु, वडानम्बर ५ के वडाध्यक्षमे पदमराज भट्ट, १४ के वडाध्यक्षमे यम लामिछाने मगर ओ १५ के वडाध्यक्षमे कमलबहादुर ढाँट उम्मेदवारी घोषणा करले बाटै ।

वडाध्यक्षमे उम्मेदवारी घोषणा करल चार जाने फेन विवेकशील साझा पार्टीमे क्रियाशील रहिट ।