कोभिड–१९ नियन्त्रणके लाग अन्तरक्रिया
पहुरा समाचारदाता
धनगढी, १९ फागुन । सुदूरपश्चिम प्रदेशके सामाजिक विकासमन्त्री लालबहादुर खड्का कैलाली–कञ्चनपुर कोभिड–१९ के जोखिम रहल ओरसे नियन्त्रण करना संचारकर्मीके महत्वपूर्ण भुमिका रहल बटैले बटैं ।
कोभिड–१९ रोगके रोकथाम तथा नियन्त्रण लाग पत्रकारके भूमिका विषयक बिफेक रोज धनगढीमे आयोजित अन्तरक्रिया कार्यक्रममे सामाजिक विकासमन्त्री खड्का धनगढीके त्रिनगर नाका ओ कञ्चनपुरके गड्डाचौकी नाका होके मनै ढेर अइनाजैना करना हुइल ओरसे यहाँ सचेतना अपनैना जरुरी रहल बटैलैं । उहाँ कलैं, ‘यहाँ भारतसे नेपाल अइना संख्या उच्च रहल ओरसे कोभिड–१९ के जोखिम रहल बा ।’ कोभिड नियन्त्रके लाग पत्रकारके महत्वपूर्ण भुमिका रहल उहाँक कहाइ बा । धनगढीके सीमा नाकामे स्वास्थ्य हेल्थ डेस्कके व्यवस्था कैके भारतसे नेपाल अइना मनैन्के स्वास्थ्य परीक्षण करना आवश्यक रहल सामाजिक विकासमन्त्री खड्का बटैलैं ।
सुदूरपश्मिके टमान ठाउके नाकासे भारत आवतजावत करना मनैन्के सख्या ढेर रहल ओरसे कोभिडके उच्च जोखिम फेन बह्रल संचारकर्मीहुक्रे जोर डेले रहैं ।
कोभिडसे बचेक लाग सबजे एकजुट ओके लग्ना ओ सुरक्षाके व्यवस्था करना धनगढी स्वास्थ्य कार्यालयके प्रमुख लालबहादुर धामी बटैलैं । उहाँ काभिड–१९ के खोप अब्बे मालपोत कार्यालय, विद्यालय, नगरपालिका ओ जिल्ला प्रशासन कार्यालय सब ठाउँमे लगैटिरहल समेत जानकारी डेलैं ।
कार्यक्रममे नेपाल पत्रकार महासंघके केन्द्रीय सचिव हेमकर्ण विक, केन्द्रीय सदस्य भरत शाह, महासंघ कैलाली जिल्ला अध्यक्ष हिमालय जोशी, महासंघ पूर्व केन्द्रीय सदस्य दिलबहादर छत्याललगायत मन्तव्य व्यक्त करले रहैं ।
नेपाल पत्रकार महासंघ सुदूरपश्चिम प्रदेश समिति अध्यक्ष योगेश रावलके अध्यक्षतामे हुइल कार्यक्रममे स्वागत सुदूरपश्चिम प्रदेश समिति उपाध्यक्ष योगेन्द्र बलायर करले रहैं । कार्यक्रमके सञ्चालन सुदूरपश्चिम प्रदेश समिति महासचिव रामसिंह ठगुन्ना करले रहैं ।
कार्यक्रम नेपाल पत्रकार महासंघ सुदूरपश्चिम प्रदेश समितिके आयोजना तथा सुदूरपश्चिम प्रदेश सामाजिक विकास मन्त्रालयके सहकार्यमे रहल रहे ।
