डुसरा खेलमे बागमती युथ क्लब विजयी
पहुरा समाचारदाता
धनगढी, २० फागुन । ए डिभिजन क्लब न्युरोड टिम एनआरटी धनगढीमे जारी सर्वाधिक धनराशीके पाँचौ मुख्यमन्त्री सुदूरपश्चिम खप्तड गोल्डकप फुटबल प्रतियोगितासे बाहर हुइल बा ।
धनगढी रंगशालामे शुकके बागमती युथ क्लबसँग पेनाल्टी सुटआउटमे ४–३ गोल अन्तरसे पराजित हुइलपाछे एनआरटी बाहर हुइल हो । प्रतिस्पर्धात्मक बनल खेलके निर्धारित समय २–२ गोलके बराबरी हुइलपाछे खेल पेनाल्टी सुटआउटमे गैल रहे । पेनाल्टीमे बागमतीके अमुल श्रेष्ठ, बिजय घलान, हिमाल घलान ओ अनिल राना मगर गोल करल रहिट ।
ओकर सुमन राई पेनाल्टीमे चुकल रहिट । एनआरटीके शिव गुरुङ, दिपेश घले ओ मेसुके ओलोमोउले गोल करल रहिट । मने, आन्द्रे थिएरी ओ सन्जिब विष्ट पेनाल्टीमे गोल करे नैसेक्लै ।
पेनाल्टी आघे एनआरटी दुई गोलके अग्रता जोगाइ नैसेक्लै । जेकर कारण एनआरटी पहिल खेलसे बाहर हुइना बाध्य हुइलै । खेलके ६८ औं मिनेटमे स्टेफेन समिरसे गोल कैटी एनआरटीहे अग्रता डेहुवाइल रहिट । खेलके ७४ औं मिनेटमे स्टेफेन पेनाल्टीसे व्यक्तिगत डुसरा गोल कैटी एनआरटीहे २–० के अग्रता डेहुवाइल रहिट । मने, खेलके ८३ औं मिनेटमे विमल घिसिङ गोल कैटी बागमतीहे २–१ के स्थितिमे लानल रहिट ।
ओकर पाछे खेलके ८५ औं मिनेटमे विजय घलान गोल कैटी बागमतीहे २/२ गोलके बराबरीमे लानल रहिट । इ जितसँगे बागमती क्वाटरफाइनलमे पुगल बा । आयोजक सुदूरपश्चिम–११ स्पोर्टस क्लब धनगढीसे आयोजना करल प्रतियोगितामे १० टिमके सहभागिता रहल बा । प्रतियोगिताके विजेता २१ लाख नगद प्राप्त कैन बाटै । उपविजेता टोली १० लाख नगद प्राप्त कैना बाटै ।
सर्वोत्कृष्ट खेलाडी एक लाख पैना बाटै कलेसे उत्कृष्ट गोलरक्षक, डिफेन्डर, फरवार्ड, सर्वाधिक गोलकर्ता ओ प्रशिक्षक सहित उदयमान खेलाडी ओ फेयर प्ले टिम जनही नगद २५ हजार प्राप्त कैना बाटै । प्रत्येक खेलके म्यान अफ द म्याच १० हजार पैना आयोजक जनैले बा । प्रतियोगितामे टिकट दर राखल बा । जौन विद्यार्थीके लाग १ सय ओ अन्यके लाग १ सय ५० राखल बा ।
