काँँग्रेस कैलालीके पदाधिकारीमे मिश्रित परिणाम
पहुरा समाचारदाता
धनगढी, २० फागुन । नेपाली काँग्रेस कैलालीके पदाधिकारीमे मिश्रित परिणाम आइल बा । सभापतिमे निर्वाचित नारायणदत्त भट्ट ओ प्रतिस्पर्धी प्रकाशबहादुर बम दुनु प्यानलसे पदाधिकारीमे निर्वाचित हुइल बटै । उपसभापति, सचिव ओ सहसचिवके मतगणना शुकके सम्पन्न हुइल हो ।
उपसभापतिमे भीम बडुवाल १३२८ ओ खेम डगौराथारु ९२३ मत नानके विजयी हुइल बटै । बडुवालसे भट्ट नेतृत्वके प्यानलसे ओ चौधरी बमके प्यानलसे उम्मेदवारी डेले रहिट । दुनु जाने सभापतिमे उम्मेदवारी लरना घोषणा करले रहिट मने टीममे सहमति हुइलपाछे ओइने उपसभापतिमे लरना राजी हुइल रहिट ।
ओस्टेक सचिवमे बम प्यानलके नृप सुनार १४९३ मत नानके विजयी हुइल बटै । सचिवमे भट्ट प्यानलके केशव मिश्र ११५६ मत नानके विजयी हुइलै । का“ग्रेसमे दुई सचिव रहना प्रावधान बा । ओस्टेक सहसचिवमे कलेशुराम चौधरी ८९६ मत ओ रामसमझ राना ८८१ मत नन्टी विजयी हुइल निर्वाचन समिति जनैले बा । कार्य समिति सदस्यके मतगणना बाँकी बा ।
बिफेक रोज हुइल मतगणनामे जिल्ला सभापतिमे संस्थापन पक्षके नारायणदत्त भट्ट विजयी हुइल रहिट । पहिल चरणमे कौनोफे उम्मेदवार ५० प्रतिशतसे ढेर मत नाने नइसेकलपाछे दुसरा चरणमे निर्वाचित हुइल रहिट । पहिल चरणमे सबसे ढेर मत नानल बम दुसरा चरणमे पराजित हुइलै । निर्वाचनमे संस्थापनके दुई ओ संस्थापन इतरके एक ठो प्यानलबीच प्रतिस्पर्धा हुइल रहे ।
पदाधिकारीमे संस्थापन इतर समूहसेफे विजयी नइहुइलै । सभापतिमे पहिल चरणसे बाहिरल शेखर कोइराला पक्षके उम्मेदवार रामबहादुर कलेलके प्यानलसे दुसरा चरणमे बमहे सघाइल रहे ।
