कैलारी कार्य सम्पादनमे नेपालके टिसरा स्थानमे
पहुरा समाचारदाता
धनगढी, २२ फागुन । कैलालीके कैलारी गाउँपालिका कार्य सम्पादन मूल्याङकनमे उत्कृष्ट पालिकामन्से नेपालमे टिसरा स्थान प्राप्त कैना सफल हुइल बा ।
थारु समुदायके बाहुल्यता रहल उ गाउँपालिकासे ७६.४९ अंक प्राप्त करके कार्य सम्पादन मूल्याङकनमे नेपालमे टिसरा स्थान प्राप्त करल हो । प्राकृतिक स्रोत तथा वित्त आयोगसे तयार पारल कार्य सम्पादन मूल्याङक प्रतिवेदन अनुसार ७८.६९ अंक पाके डडेल्धुराके अजयमेरु गाउँपालिका नेपालमे पहिल स्थानमे बा । ओस्टेक, ७६.३८ अंक पाइल कञ्चनपुरके भीमदत्त नगरपालिका चौथा स्थानमे रहल बा ।
कैलालीमे रहल १३ ठो स्थानीय तहमन्से कैलारी यहाँके स्थानीय तहहे कार्य सम्पादनमे उछिनल केल नइहो, उत्कृष्ट पाँच पालिकामन्से नेपालमे टिसरा स्थान प्राप्त कैना सफल हुइल बा । कैलालीके धनगढी उपमहानगरपालिकासे ६८.८८ अंक प्राप्त करल आयोगके प्रतिवेदनमे उल्लेख बा । सम्बन्धित स्थानीय तह ओ निकायसे प्राप्त तथ्यांक समेतके आधारमे आयोगसे कार्यसम्पादन मूल्यांकन करके अंक प्रदान करल हो । कार्यसम्पादन मूल्यांकन कैना स्थानीय तहके लाग १७ सूचक तय करल रहे ।
समयमे बजेट पेश करल/नइकरल, असार मासन्तभिटर बजेट पास करल÷नइकरल, राजस्व बाँडफाँट करल/नइकरल, अइना आवके बजेटके अनुमान अर्थमन्त्रालयमे पुस मसान्तभिटर पेस करल/नइकरल विषयमे मूल्यांकन करल रहे । ओस्टेक, आन्तरिक राजस्वके लक्ष्य ओ संकलन, अघिल्का आवके बजेट ओ खर्चके अवस्था, बेरुजु, सुत्रके प्रयोग, आवधिक योजना तय करल/नइकरल, विद्यालयमे विद्यार्थी भर्नाके अवस्था, गर्भवती महिलाके संख्या, संस्थागत प्रसुति संख्या, बालबालिकाके संख्या, खोप लगाइल बालबालिकाके संख्यालगायत शिर्षकके सूचकमे आयोगसे स्थानीय तहहे अंकभार डेहल हो ।
आयोगसे संघीय संचित कोषसे स्थानीय सरकारहे प्रदान कैना समानीकरण अनुदान सिफारिसके लाग कार्य सम्पादन मूल्यांकन करल हो । यहि मूल्यांकनके आधारमे आयोगसे आर्थिक वर्ष २०७९/८० के लाग संघसे स्थानीय तहमे प्रदान हुइना समानीकरण अनुदानके रकम सिफारिस करी ।
