वाटरपार्क निर्माण तिब्र गतिमे
निर्माण कम्पनीसे यिहे बैशाख मसान्तभिटरे नगरपालिकाहे हस्तान्तरण कैना
पहुरा समाचारदाता
धनगढी, २४ फागुन । धनगढी उपमहानगरपालिका–८ स्थित धनगढी गाउँमे बन्टी रहल वाटरपार्क (टौलाहा ताल पोखरी संरक्षण) काम अन्तिम चरणमे पुगल बा ।
यिहे अइना बैशाख मसान्तभिटरे नगरपालिकाहे हस्तान्तरण हिसावसे कामहे तिब्रता डेहल निर्माणकर्ता रोयल पवन जेबी फर्मके प्रमुख महेश महरा बटैलै । ६ कटठा क्षेत्रमे बन्टी रहल वाटरपार्क २०७६ साल फागुनसे बन्ना सुरु हुइल रहे, उहाँ कहलै, –‘यकर निर्माण अवधि १५ महिना रहलसेफे कोरोना महामारी, गहिर ठाउँ पानी जम्ना ठाउँ रहल ओरसे यम्ने चैत्र बैशाख जेठ महिनामे केल काम कैना अवस्था रहल । लगातार २ बरसके कोभिडके कारण काम करे नइपाइल अवस्थामे २०७९ बैशाख मसान्तमे काम ओरैना ओ उहेसम म्याद रहल उहाँ बटैलै ।
कोरोना, चुनाव या विपतके कारणसे कौनो अवरोध नइअइलेसे बैशाख मसान्तसम निर्माण सम्पन्न करके धनगढी उपमहानगरपालिकाहे हस्तान्तरण कैना हिसावसे कामहे तिब्रता डेहल बा ।
रोयल पवन जेबी फर्म धनगढी २ करोड ३५ लाख भ्याट सहिट ठेक्का पैले रहे ।
कैसिन डिजाइन बनाटा टे वाटरपार्क
यकर बनाट एक ठो इनर रिटेलिङ वाल बा । जौन पोखरीहे कभर कैना करी । ओकरपाछे बाहेर आउटरमे पहिल ओ दुसरा चेक वाल दुई ठो ओ ओकरपाछे बाउण्डरी वाल करके तीन ठो वाल रही । मनै नेंग्ना सब वे डगर रहना बा ।
मेन गेट दक्षिण साइड ओ उत्तरपश्चिममफे सहायक गेट बन्ना निर्माण कम्पनी जनैले बा । पुरुवओर वालसे जोरल ड्रेन जाई । वाटरपार्क निरिक्षण अवलोकन करे मनैके बैठना चार पाँच ठो सेड बन्ना जनागिल बा । पोखरीके मुख्य वालमे अल्मुनियम लाइन रेलिङसे घेरजैना यकर डिजाईनमे रहल बा । पोखरीके कोनुवामे बक्स बनाइल बा जहाँ बृक्ष रोपण कैजाई । साइड साइडमे ठाउँ ठाउँमे टमान छोट छोट सर्कल बनाके कहु वृक्ष रोपण, कहु ल्याण्ड स्केपिङ, कहु घाँस लगैना, कहु फुला लगैनाफे वाटरपार्कके डिजाइनमे बा ।
गेट लग्ना, चारुओर बउण्डरी लग्ना ओरसे सेक्यरिटी गार्ड पोस्टफे बन्लेसे काल्हके दिन टिकट सिस्टमफे हुई सेक्न जनागिल बा । ८० प्रतिशत काम हुसेकल निर्माणकर्ता रोयल पवन जेबी फर्मके प्रमुख महेश महरा बटैलै ।
मुख्य बनावटके कर्रा काम ओराइल बा,’ उहाँ कहलै –‘आब बउण्डरी वाल, एल्मुनियम लगैना, घाँस, फुला ओ बृक्ष रोपणके काम केल बाँकी बा । सजिसजवटके काम बाँकी बा ।’
यहाँ एकदम पानी जम्ना हुइल ओरसे यिहीसे संरक्षण करेक लाग विकास करे खोजल धनगढी उपमहानगरपालिका–८ के वडा अध्यक्ष नारायण बराल बटैलै । एक ओर संरक्षणसंगे विकास हुइना हुइना दुसरओर पर्यटकीय गन्तव्य क्षेत्रफे बन्ना उद्देश्य लेहल उहाँ बटैलै । वाटरपार्कमे तत्काल बोटिङ कैना लाउ नइ रहल मने भविष्यमे बोटिङके व्यवस्था करे सेक्ना कहल बा ।
