महिलाहे आर्थिक रुपमे आत्मनिर्भर बनैना आवश्यक : अध्यक्ष चौधरी

पहुरा समाचारदाता
धनगढी, २४ फागुन । कैलालीके कैलारी गाउँपालिकाके अध्यक्ष लाजुराम चौधरी महिलाहे आर्थिक सशक्तिकरण आवश्यक रहल बटैले बाटै ।

मंगरके हसुलियामे हुइल ११२औँ अन्तराष्ट्रिय श्रमिक महिला दिवस कार्यक्रमहे सम्बोधन कैटी अध्यक्ष चौधरी महिलाहे आर्थिक रुपमे सशक्तिकरण कैना आवश्यक रहल बटाइल हुइट ।

अध्यक्ष चौधरी शिक्षा तथा आर्थिक रुपमे कमजोर रहल कारण फेन महिला घरेलु हिंसा लगायत टमान समस्यासे पीडित हुइ पर्र्ना बाध्यता रहल बटैलै । उहाँ कहलै,–‘महिलाहुक्रे आभिन फेन शिक्षा तथा आर्थिक रुपमे कमजोर रहल बाटै । जिहीसे उहाँहुक्रे उनीहरु घरेलु हिंसा लगायत टमान समस्यासे पीडित हुइ पर्र्ना बाध्यता रहल बाटिन् ।’

अध्यक्ष चौधरी महिलानहुक्रे आर्थिक रुपमे शसक्त नैहुइटसम इ मेरके समस्या हरदम झेले पर्ना फेन बटैलै । ‘जबसम महिलाहुक्रे आर्थिक रुपमे ससक्त नैहुइही तबसम उहँँहुक्रे महिला हिंसा, घरेलु हिंसासे पीडित हुइटी रहीही’, उहाँ कहलै ।

महिलाहे आर्थिक रुपमे आत्मनिर्भर ओ सचेत बनाइक लाग गाउँपालिकासे सीपमूलक तथा क्षमता विकासके तालिम ओ टमान मेरिक सचेतनामूलक कार्यक्रम सञ्चालन कैटी आइल उल्लेख करटी उहाँ तालिम लेके अब्बे सयौँ महिला आर्थिक रुपमे आत्मनिर्भर फेन हुइल बटैलै ।

कार्यक्रममे वडा नम्बर ३ के वडा अध्यक्ष कैलाश चौधरी, पारदर्शी महिला वहुउद्देश्यीय सहकारी संस्थाके अध्यक्ष गीता चौधरी, ओरेक नेपालके जयकला चौधरी लगायत शुभकामना मनतब्य राखल रहिट ।

उहे अवसरमे महिला सशक्तिकरणके क्षेत्रमे उत्कृष्ट योगदान पुगुइया संघ संस्था तथा व्यक्तित्वहे सम्मान करल बा ।

महिला सशक्तिकरणके क्षेत्रमे उत्कृष्ट योगदान पुगुइया सहकारी ओर समीक्षा महिला बहुउद्देश्यीय सहकारी संस्था, पारदर्शी महिला वहुउद्देश्यीय सहकारी ओ चेतनशील महिला वहुउद्देश्यीय सहकारी संस्था रहल बावै ।

ओस्टके मेसन डकर्मीओर लीला चौधरी, अटोचालक रामपति चौधरी, सिलाई कटाईओर चम्पा बोहरा, बेतबासओर शान्ती चौधरीहे डोसल्ला सहित सम्मानपत्रसे सम्मान करल बा ।

कार्यक्रम गाउँपालिकाके उपाध्यक्ष लक्ष्मी सत्गौंवाके अध्यक्षतामा हुइल रहे । कार्यक्रममे स्वागत मन्तव्य महिला तथा बालबालिका शाखा प्रमुख बालकुमारी चौधरी राखल रही । कार्यक्रमके सञ्चालन समाजिक विकास अधिकृत यगम कलेल करल रहिट ।

कार्यक्रममे कार्यपालिका सदस्य रञ्जीता चौधरी, खडक सिंह कामी, चेतनशील बहुउद्देश्यीय सहकारी संस्थाके अध्यक्ष हिरा चौधरी लगायतके पहुना रहल रहिट ।

कार्यक्रममे जनचेनतामूलक नाटक ओ सांस्कृतिक कार्यक्रम फेन हुइल रहे । कैलारी गाउँपालिका महिला तथा बालबालिका शाखाके आयोजनामा हुइल कार्यक्रमहे पारदर्शी महिला वहुउेद्दश्यी सहकारी संस्था, सामाजिक सेवा अध्ययन केन्द्र, मुक्त कमैया महिला विकास मञ्च, महिला पुनस्र्थापना केन्द्र, फाया नेपाल, सुहारा कार्यक्रम, दलित महिला अधिकार मञ्च, बाल कल्याण संघ टीकापुर ओ कालिका कृषि सहकारी संस्था लगायत संघ संस्था सहकार्य करले रहे ।