खप्तड गोल्डकपः लिग च्याम्पीयन मछिन्द्रहे स्तब्ध परटी सेमीफाईनलमे

पहुरा समाचारदाता
धनगढी, २४ फागुन । सहिद स्मारक ए डिभिजन लिग च्याम्पीयन मछिन्द्रहे स्तब्ध परटी बागमती युथ क्लब सर्वाधिक धनराशीके पाँचौ मुख्यमन्त्री सुदुरपश्चिम खप्तड गोल्डकप फुटबल प्रतियोगिताके सेमिफाइनलमे प्रवेशमे करले बा । धनगढी रंगशालामे मंगर ए डिभिजन लिग च्याम्पियन मछिन्द्र फुटबल क्लबहे पेनाल्टी सुटआउटमे ४–२ से हरैटी बागमती अन्तिम चारमे पुगल हो । मछिन्द्र लिग च्याम्पीयन बन्दा अपराजित रहल रहे ।

गोल्डकपमे वागमतिसे अपत्यासित नतिजा नन्टी आइल बा । पहिल खेलमे वागमति लिगके टिसरा स्थानमे रहल एनआरटीहे हराइल रहे । आब बागमतीसे सेमिफाईनलमे फ्रेन्ड्स क्लबके सामना कैना आयोजक सुदुरपश्चिम–११ स्पोर्टस क्लबके सचिव तथा प्रवक्ता ओम विक्रम चन्द जानकारी डेलै ।

खेलके निर्धारित समय गोलरहित बराबरीमे सेकलपाछे खेल पेनाल्टीमे गैल रहे । वागमतिहे अन्तिम चारमे पुगैना अमर श्रेष्ठ, ईमान घलान, विदेशी खेलाडी ड्याडी, अनिल राना मगर गोल करलै । वागमतिके दिवश लिम्बुके प्रहारहे मछिन्द्रके गोलरक्षक विशाल श्रेष्ठ बटैलै । मछिन्द्रके लाग कप्तान रञ्जित धिमाल ओ विमल घर्तीमगर गोल करलै । विशाल राई ओ विदेशी खेलाडी ओमाडेजके प्रहार गोलपोष्टसे बाहिरल । खेलमे उत्कृष्ट प्रदर्शन करल वागमतिके निकोलस फर्नाडेज म्यान अफ द म्याच हुइलै । उहाँ नगद १० हजार प्राप्त करलै ।

खेलपाछे प्रतिक्रिया देटी वागमति युवा क्लवके प्रशिक्षक रोहित केसीसे लिग च्याम्पीयन ओ ए डिभिजन खेलाडीहुकनके अपन खेलाडीहुक्रे हरैटी बहुट खुशी लागल बटैलै । उहाँ भारी क्लबहे हरैटी मनोबल बढ्टी गैल ओ प्रतियोगिताके उपाधि जित्न दावी करलै । ‘आज एकदम खुशी बटी । लिग च्याम्पीयनहे जित्न सफल हुइली । मोफसल क्लब फे ए डिभिजनसे कम नइहुइट कहिके प्रमाणित कैनाफे सफल हुइल बटी ।

पेनाल्टीमे लैजैना रणनिति रहे । दुसरा हाफमे रणनिति चेन्ज करेबेर नतिजा हमार पक्षमे आइल । खेलाडीहुकनके मनोवलफे बढल कारण जिटली ।’ प्रशिक्षक केसी कहलै–‘नियमति टेनिंग करेबेरके नतिजा निकरल । आब हम्रे सेमीफाईनलमेफे एक डिभिजन क्लबहे हरैबी ओ उपाधि जित्बी ।’

खेलपाछे प्रतिक्रिया डेटी मछिन्द्रके प्रशिक्षक प्रवेश कटुवाल शतप्रतिशत डेहे बेर फे गोल करे नइसेक्के ओ भाग्यसे साथ नइडेके पराजय भोगे परल बटैलै ।

आयोजक सुदुरपश्चिम–११ स्पोर्टस क्लब धनगढी आयोजना करल प्रतियोगितामे १० टिमके सहभागिता रहल बा । ‘पहिल म्याच हुके गाहेफे हुइली । ओइनके टारगेट पेनाल्टीमे लैजैना रहे । ओेम्ने वागमति सफल हुइल । प्रेसरमे खेलेबेर ओ खेलहे ईजी लेहेबेर यी नतिजा आइल । हम्रहिनहे भाग्यफे साथ नइडेहल ।’ प्रशिक्षक कटुवाल कहलै–‘हम्रे हन्डेड परसेन्ट डेके फे मजा चान्समे गोल हुई नइसेकल । मैदानके कारणफे खेल्न गाहे हुइल । वागमित विदेशी खेलाडी थप्ले बटै ।