सोनके भाउमे नयाँ रेकर्ड
काठमाडौं, २५ फागुन । बुधके रोज सोनके भाउ नयाँ रेकर्ड बनैले बा । नेपाल सुनचाँदी व्यवसायी महासंघके अनुसार बुधके रोज सोनके मूल्य प्रतितोला १ लाख ५ हजार ५ सय रुपैयाँ कायम हुइदल बा । मंगरके रोज १ लाख ३ हजार कायम हुइल रहे ।
आघेक दिनके तुलनामे २ हजार ५ सय रुपैयाँसे मूल्य बह्रलसँगे डेढ वर्षआघेक उच्च मूल्यके रेकर्ड बनैले बा । २०७७ साउन २३ गते प्रतितोला १ लाख ३ हजार ५ सय रुपैयाँमे सोनके कारोबार हुइल रहे । उबेला कोरोना महामारीके कारण सोनके माग अत्याधिक बह्रके मूल्य बह्रल रहे । यी चो भर युक्रेनउप्पर रुसके आक्रमणके कारण सोनके भाउ बह्रल व्यवसायी बटैठैं ।
सुनचाँदी व्यवसायी महासंघके पूर्व अध्यक्ष मणिरत्न शाक्यके अनुसार विश्वमे महामारी, युद्ध वा अन्य संकट आइलबेला सोनके मूल्य सबसे हलि प्रभावित हुइठ । ‘अइसिन संकटके बेला टमान देशके सरकार तथा भारी लगानीकर्ता सोनमे लगानी बह्रैठै टबेमारे मागसँगे मूल्य बह्रठ,’ उहाँ कलैं ।
युक्रेनउप्पर हुइल आक्रमणहे लेके रुसउप्पर अमेरिका पेट्रोलियम पदार्थके आपूर्तिमे प्रतिबन्ध लगैना हुइलओरसे सोनके मूल्य बुधके रोज थप बह्रल व्यवसायीके कहाइ बा । यीआघे मंगरके रोज सोनके मूल्य स्थिर रहल रहे ।
नेपालमे वाणिज्य बैंक सोन आयात कैके व्यापारीहुकनहे बिक्री करठ । हाल दैनिक १० केजी किल सोन आयात करे पैना व्यवस्था बा । बुधके रोज चाँदीके भाउ फेन बह्रल बा । चाँदी प्रतितोला १४५० रुपैयाँमे कारोबार हुइल बा । आघेक दिन १४१० रुपैयाँ रहे । सामान्यत सोन ओ चाँदीके भाउ सम्बन्ध सकारात्मक रहठ । प्रायः सोनके भाउ बह्रलेसे चाँदीके फ्न बह्रठ ।
