प्रदेशमे कोरोनाके सक्रिय संक्रमित १५२ जाने
पहुरा समाचारदाता
धनगढी, २५ फागुन । सुदूरपश्चिम प्रदेशमे अभिनसम कोरोना भाइरसके सक्रिय संक्रमितके संख्या अभिन १ सय ५२ रहल बा । कलेसे संक्रमणदर भर न्यून डेखल बा ।
सामाजिक विकास मन्त्रालय सुदूरपश्चिम प्रदेश स्वास्थ्य निर्देशनालयसे डेहल जानकारी अनुसार प्रदेशमे अभिनसम १ सय ५२ जाने कोरोना भाइरसके सक्रिय संक्रमित रहल बटै । जेम्ने आरटी पीसिआरके १५ जाने ओ एन्टीजेनके १ सय ३७ जाने रहल बटै । प्रदेशमे आरटी पीसिआरके कैलालीमे १० जाने बटै, बैतडीमे २, कञ्चनपुर, डोटी ओ डडेल्धुरामे एक/एक जाने बटै । कलेसे चार जिल्ला अछाम, बझाङ, बाजुरा ओ दार्चुलामे आरटी पीसिआरके अक्को सक्रिय संक्रमित नइरहल निर्देशनालय जनैले बा ।
ओस्टेक प्रदेशमे एन्टीजेनके सक्रिय संक्रमित १ सय ३७ जाने रहल बटै । जेम्ने सबसे ढेर कैलालीके ७१ जाने रहल बटै । कञ्चनपुरमे २७, डोटीमे ६, दार्चुलामे ४, डडेल्धुरामे ४, बाजुरामे ८, बझाङमे ३ बैतडीमे ११ ओ अछाममे ३ जाने निर्देशनालय जनैले बा ।
निर्देशनालयसे डेहल जानकारी अनुसार पछिल्का २४ घण्टामे ८ सय १० जानेक एन्टीजेन करल मन्से २ जनहनमे केल संक्रमण पुष्टि हुइल बा । यिहे अवधिमे ३ जाने चोखाइल बटै । प्रदेशमे अभिनसम ५ लाख १५ हजार ७०० जानेक कोरोना परिक्षण हुइल बा, कलेसे ६३३ जानेक कोरोना संक्रमणके कारण मृत्यु हुइल निर्देशनालय जनैले बा । ओस्टेक पछिल्का २४ घण्टामे २२४ जनहनमे कोरोना भाइरस संक्रमण पुष्टि हुइल बा ।
स्वास्थ्य तथा जनसंख्या मन्त्रालयके अनुसार ६ हजार ९३६ पीसीआर परीक्षणमा ६८ जाने ओ ३ हजार १५६ एन्टिजेन परीक्षणमे १५६ जनहनमे संक्रमण पुष्टि हुइल हो । कलेसे यी अवधिमे २५१ जाने संत्रमणमुक्त हुइल बटै । ५ हजार ६९२ जाने सक्रिय संक्रमितमन्से संस्थागत आइसोलेसनमे १२४ जाने रहल बटै । उ मन्से ३९ जाने आईसीयूमे ओ ५ जाने भेन्टिलेटरमे रहल बटै ।
