सुदूरपश्चिम खप्तड गोल्डकप: पहिल विजेता मनाङ ओ पहिल सहभागी फेन्ड्सके उपाधिके लाग भिरना
पहुरा समाचारदाता
धनगढी, २७ फागुन । सर्वाधिक धनराशिके पाँचौ मुख्यमन्त्री सुदूरपश्चिम खप्तड गोल्डकप फुटबल प्रतियोगिताके फाइनल काल्ह (शनिच्चरके रोज) धनगढीमे हुइटा । पाँचौ संस्करणके उपाधिके लाग पूर्व च्याम्पीयन मनाङ मस्र्याङदी क्लव ओ फ्रेन्ड्स क्लवबीच प्रतिस्पर्धा हुइटा । जेम्ने दुनु टिम उपाधि जिट्ना दाबी करले बटैं ।
मनाङ गोल्डकपमे पाचौं संस्करणसम सहभागी रहल बा । पहिल संस्करणके च्याम्पियन मनाङ दोस्ररचो उपाधि जिट्ना दाउमे रहल बा । फेन्ड्स भर पहिलचो गोल्डकपमे सहभागी हुइल हो । पहिल सहभागितामे उपाधि जिट्ना धुनमे फेन्ड्स रहल बा ।
मनाङके कप्तान अञ्जन विष्ट फाईनलमे अपनहे कौनो दवाव नैरहल ओ नकआउट प्रतियोगितामे जस्टे विपक्षी रलेसे फेन जितके लाग खेल्ना बटैलैं । ‘नकआउट प्रतियोगिताके सब खेल फाइनल सरह हो । हम्रिहिनहे दर्शकके फेन साथ बा । हम्रे फाइनल जिटब,’ कप्तान अन्जन कलैं । ओस्टेक, मनाङके प्रशिक्षक राजेन्द्र तामाङ खप्तड गोल्डकपके उपाधि जिटल खण्डमे अपनहे लिगमे भोगल नजितामे कुछ हदसम मलम लगैना मौका मिल्ना बटैलैं ।
फ्रेन्ड्सके प्रशिक्षक मिग्रेन्द्र मिश्र कम्तीमे ७२ घण्टाके आराम पाइल खण्डमे खेलाडी ढेर आराम पैलेसे फेन अपनेहुक्रे फाइनलके लाग तयार रहल बटैलैं । उहाँ मनाङ बलगर टिम रहल ओ अब्बे फ्रेन्ड्स टिम फेन मजा करल बटैलैं । मने फाइनलमे जितके लाग खेल्न उहाँ बटैलैं ।
ए डिभिजन लिगमे मनाङ ओ फ्रेन्ड्स भिड्दा मनाङ विजयी हुइल रहे । खप्तड गोल्डकपमे फ्रेन्ड्स सेमिफाईनलमे बागमती युथ क्लवहे हटैले रहे कलेसे मनाङ हिमालयन शेर्पाहे हटैले रहे ।
समापन समारोहके प्रमुख अतिथि संस्कृति पर्यटन तथा नागरिक उड्यन मन्त्री प्रेम आले रहल बटैं ।
आयोजक सुदूरपश्चिम–११ स्पोर्टस क्लब धनगढीसे आयोजना करल प्रतियोगिताके विजेता २१ लाख नगद प्राप्त करि । उपविजेता टोली १० लाख नगद प्राप्त करि । सर्वोत्कृष्ट खेलाडी एक लाख पाइ कलेसे उत्कृष्ट गोलरक्षक, डिफेन्डर, फरवार्ड, सर्वाधिक गोलकर्ता ओ प्रशिक्षक सहित उदयमान खेलाडी ओ फेयर प्ले टिम जनही नगद २५ हजार प्राप्त करहि । प्रत्येक खेलके म्यान अफ द म्याच १० हजार पैना आयोजक जनैले बा ।
