रेशम चौधरीके रिहाइके लाग सशक्त आन्दोलन: डा. भट्टराई
पहुरा समाचारदाता
धनगढी, २९ फागुन । जनता समाजवादी पार्टीके संघीय परिषदके अध्यक्ष डा.बाबुराम भट्टराई जेल जीवन बिटैटी रहल सांसद रशम चौधरीके रिहाइके लाग पार्टी सशक्त आन्दोलन करे पर्ना बटैले बाटै ।
शनिच्चरके रोज राजधानीमे आयोजना हुइल जनता समाजवादी पार्टीके संघीय परिषदके एक दिवसीय बैठकमे डा. भट्टराई आपन राजनीतिक प्रतिवेदन प्रस्तुत कैटी ओइसीन बटाइल हुइट । उहाँ प्रतिवेदनमे राजवन्दीहुक्रनके रिहाई करे पर्ना अग्रसरता पार्टीसे लेहे पर्ना उल्लेख करलै ।
‘जनयुद्ध, मधेस जनविद्रोह, थारु विद्राह, आदिवासी जनजाति लगायत अन्दोलनके शहीद, बेपत्ता, घाइते अपाङ्ग, राजवन्दी ओ पीडितके समस्याहे वृहत शान्ति सम्झौता ओ राजनीतिक सहमतिके आधारमे यथाशिघ्र हल कैना पार्टीसे दबाब डेहे परल ।
मधेक आन्दोलनके क्रममे लगाइल झुटा मुद्दाके खारेजी, लाल आयोगके प्रतिवेदन सार्वजनीकरण, रेशम चौधरी लगायतके राजवन्दीके रिहाइके लाग फेन पार्टी सशक्त आन्दोलनके अगुवाइ करे परल’, उहाँ प्रतिवेदनमे उल्लेख कैले बाटै ।
