लखागिन थारु उत्थान मञ्चके प्रथम साधारणसभा
पहुरा समाचारदाता
सुर्खेत, २९ फागुन । लखागिन थारु उत्थान मञ्च वीरेन्द्रनगर सुर्खेतके प्रथम साधारणसभा शनिच्चरके रोज नयाँ कार्यसमिति चयन करटि समापन हुइल बा । नयाँ कार्यसमिति मानबहादुर चौधरीके अध्यक्षतामे गठन हुइल हो ।
कार्यसमितिके उपाध्यक्षमे लोकबहादुर चौधरी, सचिवमे जीतबहादुर चौधरी कोषाध्यक्षमे राजु चौधरी, सहसचिवमे कृष्णा चौधरी चयन हुइल बटैं । औसटेक, सदस्यमे लक्ष्मण चौधरी, प्रभा चौधरी, माया चौधरी ओ बेन्जु चौधरी चयन हुइल बटैं ।
उ अवसरमे सुर्खेतके संस्कृतिसम्बन्धी अनुसन्धानमूलक पुस्तक लखागिन जर्नल २०७८ के विमोचन हुइल बा ।
यीआघे कार्यक्रम वीरन्द्रनगर नगरपालिका वडा नम्बर २ के वडाध्यक्ष बलबहादुर रोकाय एक कार्यक्रमके बीच उद्घाटन करले रहैं ।
लखागिन थारु उत्थान मञ्च सुर्खेतके अध्यक्ष एवम् जर्नलके सम्पादक मानबहादुर चौधरी ‘पन्ना’ लखागिन जर्नलमे विशेष कैके सुर्खेती थारुहुकनके तथ्यांक, भाषिक, सामाजिक, सांस्कृतिक, शैक्षिक तथा धार्मिक अवस्थाके खोज अनुसन्धान करनाके साथे थारु जातिके टमान थर उपथर गोत्र समेतके अध्ययन विश्लेषण करल बटैलैं । उहाँ यी जर्नलसे युवा पुस्तासे लेके पुरान पुस्ताके लाग कोशे ढुंगा सावित हुइना बटैलैं । साथे जर्नलमे नेपालके मोरङसे लेके कञ्चनपुर जिल्लासमके थारु साहित्यकार, तथा अनुसन्धानकर्मीहुकनके लेख, रचना, थारुहुकनके लोककला, साहित्य संस्कृतिके विषयवस्तु समोटल ओरसे एक चो अध्ययन करना आग्रह करलैं ।
ओस्टेक, थारु कल्याण कारिणी सभाके केन्द्रीय सदस्य कृष्णबहादुर थारु थारुहुकनके कला, संस्कृति मूल्य मान्यता आदि विविध विषयके अनुसन्धान करल लखागिन जर्नल सुर्खेतके ऐतिहासिक दस्तावेज रहल बटैलैं । सुर्खेतमे अइसिन खोजमूलक पुस्तक प्रकाशन हुइ नैसेकल अवस्थामे यी जर्नलके महत्व रहल उहाँ बटैलैं ।
जर्नल प्रकाशन टिमके संरक्षक एवम् समाजसेवी शनिश्रा दहित जर्नल प्रकाशन हरेक काम करेबेर समस्या ओ चुनौती अइना हुइल ओरसे समस्याके सामना करटि आघे बह्रलेसे किल थारु समुदायके भाषा, साहित्य कलाके विकास हुइना बटैलैं ।
ओस्टेक, कार्यक्रममे जर्नलके टिप्पणी करटि मध्यपश्चिम विश्वविद्यालयके लाइब्रेरी प्रमुख संग्राम चौधरी थारुहुकनके पहिचानहे दस्ताबेजीकरण करेक लाग हरेक शिक्षित थारु युवाहुक्रे अपन पुर्खाहुकनके कला, संस्कृतिहे खोज अनुसन्धान कैके प्रचारप्रसार करेपरना आवश्यकता रहल बटैलैं ।
लखागिन थारु उत्थान मञ्चके सल्लाहकार लालबहादुर चौधरी हरेक जातिके कला संस्कृति नेपालके संस्कृति रहल ओरसे यकर संरक्षण करना राज्यके दायित्व रहल बटैलैं मने राज्य थारुहुकनके कला संस्कृति मूल्य मान्यताप्रति उदासिन रहल उहाँ बटैलैं । कर्णाली प्रदेशके गहनाके रुपमे रहल सुर्खेती थारु जातिके संस्कृतिप्रति स्थानीय सरकार, प्रदेश सरकार गम्भीर नैरहल ओरसे उहाँ दुःख व्यक्त करलैं । उहाँ आगामी दिनमे सहयोग करना सरकरसे माग करलैं ।
कार्यक्रममे सुर्खेतके थारु अगुवा, समाजसेवी मानवीर थारु, दुर्गबहादुर चौधरी, टेकबहादुर चौधरी, शेरबहादुर थारु, दिलबहादुर चौधरीलगायत थारुहुकनके संस्कृति संरक्षण करेपरनामे जोड डेले रहैं ।
कार्यक्रमके सञ्चालन कार्यसमितिके सचिव जीतबहादुर चौधरी करले रहैं ।
