‘पिर’ हे लेके विवाद कैना आवश्यक नैहो : प्रचण्ड
पहुरा समाचारदाता
धनगढी, ३० फागुन । नेकपा माओवादी केन्द्रके अध्यक्ष पुष्पकमल दाहाल प्रचण्ड कलाकार प्रकाश सपुतके गीत ‘पिर’ हे लेके विवाद नैकरे पर्ना बटैले बाटै ।
सोम्मारके धनगढी विमानस्थलमे पत्रकारसँग बातचित कैटी उहाँ अपने पूरा गीत हेरे नैपैलेसे फेन मिडिया मार्फत पता पाइल कहटी गीतहे लेके कोइ आवेगमे आइ नैपर्ना बटाइल हुइट ।
‘मै उ पूरे गीत हेरे पाइल नैहुइटु । जनयुद्धहे संविधानसभामे लन्ना ठिक रहे कि नैरहे?,’ प्रचण्ड प्रश्न करलै ।
उहाँ आघे कहलै, ‘मै चाहेँ कतारमे जाइबर होए, चाहे मलेसियामे गैलबेला सयौं सयौंमे जनयुद्धमे सहभागी लडाकुहुक्रे बडो दुःखपूर्ण जीवन बिटाइल रहिट । मै जत्रा जनहनहे भेट्नु उहाँ ओइसीन दुःख कैके फेन उहाँहुक्रे महिन कहिट, कमरेड फेनसे अपनेनहे असजिलो परी कलेसे कहबी रु हम्रे बिग्रल नैहुइटी, विचलित हुइल नैहुइटी । देशके लाग, राष्ट्रके लाग शान्तिमे अइही परट, समावेशीतासँग सक्कु उत्पीडित वर्ग कुछ न कुछ हक अधिकार पाइल बाटै कहिके गर्व कैके बैठल पक्ष फेन बा । बर्बाद पारल माओवादी पार्टी शान्तिमे लानके कहुइया फेन बाटै ।’
जनयुद्धमे महिला वीरता ओ कीर्तिमान कायम करल बात फेन रहल प्रचण्ड स्मरण करैलै ।‘महिलाहुक्रनके काल्ह जनयुद्धके बेलामे वीरता ओ ओकर कीर्तिमान कायम करल बात फेन बा । राज्यके ओरसे करल दमनके पक्ष फेन बावै्,’ उहाँ कहलै, ‘इ विषयमे मोर विचारमे अब्बे उत्तेजित कुहीहे हुइ पर्ना नैहो । पक्ष ओ विपक्ष, तर्क वितर्क हुइठ्, उहीहे स्वभाविक रूपमे लेहे परठ् । इ हम्रे जासेकलपाछे फेन सयौं बरससम रही ।’
सशस्त्र युद्धमे सहभागी महिला छापामा देह व्यापारमे संलग्न हुइल दृश्य चित्रणप्रति आपत्ति जनैटी माओवादीके जनवर्गीय सङ्गठनके कुछ नेता गीतके म्युजिक भिडियो युट्युबसे हटैना चेतावनी फेन डेले बाटै ।
ओस्टके पत्रकारन बिच बाट बट्वाइटी अध्यक्ष प्रचण्ड सुदूरपश्चिम प्रदेश सरकारमे नेपाली कांग्रेसके सहभागी फेन हुइना बटैले बाटै । अध्यक्ष प्रचण्ड कांग्रेसहे सुदूरपश्चिम सरकारमे भित्र्याइनाबारे छलफल हुइटी रहल बटैलै ।‘चुनाव आल बा, कांग्रेस फेन सरकारमे जाइ चाहल बा’, प्रचण्ड कहलै, ‘एकीकृत समाजवादीके कुछ मन्त्रीहे फिर्ता बोलाके कांग्रेस भित्र्याइना सहमति हुइल बा ।’
इ बारे समाजवादीके अध्यक्ष माधवकुमार नेपालसँग फेन छलफल हुइल उहाँ बटैलै । हाल सुदूरपश्चिम सरकारहे कांग्रेसके समर्थन रलेसे फेन सरकारमे नैहो । ११ सदस्यीय मन्त्रिपरिषद्मे सात समाजवादी ओ चार माओवादीके मन्त्री रहल बाटै ।
उहे बिच अध्यक्ष प्रचण्ड अर्ली इलेक्सनके सम्भावना फेन नैरहल बटैले बाटै । एमालेके अवरोधके कारण ६ महिनासे संसद सहजरुपमे चले नैसेकल बेला सत्तारुढ गठबन्धनभित्रे स्थानीय तहके चुनावआघे अर्ली इलेक्सनबारे छलफल हुइटी रहल विवरण सार्वजनिक हुइटी रहल बेला पूर्वप्रधानमन्त्री प्रचण्ड आब नियमित चुनाव किल हुइना बटैलै । उहाँ कहलै, ‘एमाले दुईचो संसद विघटन करल । अब्बे संसद चले डेहल नैहो । अर्ली इलेक्सनबारे भ्रम फैलाइल बा । उ सत्य नैहो ।’
३० वैशाखमे स्थानीय तहके चुनाव घोषणा होसेकल ओ आ उहे अनुसार प्रक्रिया आघे बह्रना प्रचण्ड बटैलै ।
