तरङ्गिनीके नमूना परियोजना बारे जानकारी
पहुरा समाचारदाता
हसुलिया, ३० फागुन । महिला मानव अधिकार रक्षकहुक्रनके राष्ट्रिय सञ्जालके सचिवालय तरङ्गिनी महिला अधिकार प्रशिक्षण केन्द्र (तरङ्गिनी फाण्डेशन)के नमूना परियोजना बारे जानकारी डेहल बा ।
सोम्मारके कैलारी गाउँपालिकाके हसुलियामे हुइल परियोजना परिचायात्मक तथा छलफल कार्यक्रममे उ परियोजना बारे जानकारी डेगैल हो । लैंगिकतामे आधारित हिंसा रोक्न तथा रोकथाम ओ प्रतिकार्य कैना, महिला समूहहे सिप तथा गतिविधी सँग जोर्ना सहयोग कैके नेतृत्व विकास तथा क्षमता अभिवृद्धि कैना परियोजना सञ्चालन करे लागल हो ।
ओस्टके स्थानीय सरकार विशेष कैके न्यायिक समिति ओ संरक्षण कलष्टरके संलग्नतामे लैंगिक हिंसा प्रतिकार्य संयन्त्रके नक्सांकन ओ मानक सञ्चालन प्रक्रिया विकास कैके सन्दर्भ प्रणालीहे सुदृढिकरण कैना ओ विद्यमान महिला अधिकारकर्मी तथा अभिायकर्मीनहे मानवीय साझेदारी प्लेटफर्म मोडेलमे सहभागी कराके आधारमे हुइना लैंगिक हिंसा विरुद्ध स्थानीय आपतकालीन प्रतिकार्य योजना निर्माण कैना परियोजनाके लक्ष्य रहल बा ।
साथे स्थानीय सरकार, वित्तीय संस्था ओ अन्य संघसंस्थासंग समन्वय कैके प्रभावितहुक्रनके आर्थिक सशक्तिकरण कैना सीप तालिम, जिविकोपार्जनके अवसर डेना ओ व्यवसाय सुरुवात कैनामे सहयोग कैना संस्थाके उद्देश्य रहल बा ।
कैलारी गाउँपालिके अध्यक्ष लाजुराम चौधरी परियोजना लागू हुइलेसे लैंगिक हिंसा रोकथाम, महिला समूहहे सिप तथा गतिविधी सँग जोर्ना सहयोग ओ नेतृत्व विकास तथा क्षमता अभिवृद्धि कैना सहयोग पुग्ना विश्वास व्यक्त करल रहिट ।
केयर नेपालके सहयोगमे तरङ्गिनी फाउण्डेशनसे कैलारी गाउँपालिकाके वडा नम्बर ५ ओ ७ मे परियोजना लागू हुइना तरङ्गिनी फाउण्डेशनके सामाजिक परिचालक विनोद चौधरी जानकारी डेलै ।
इहे मार्चसे जुन महिनासम ४ महिना सञ्चालन हुइना परियोजनाके कूल बजेट १२ लाख ९० हजार रहल बा । परियोजनाके लक्षित समूहमे महिला समूह, पुरुष समूह, न्यायिक समिति, संरक्षण कलष्टर, लैंगिक हिंसा प्रभावित व्यक्ति रहल बाटै ।
कार्यक्रममे गाउँपालिका उपाध्यक्ष लक्ष्मी सत्गौंवा, वडा अध्यक्ष, न्यायिक समितिके सदस्य, कार्यपालिका सदस्य, जनप्रतिनिधी, कर्मचारीहुक्रनके सहभागिता रहल रहे ।
