अस्थायी प्रहरी पोष्ट हस्तान्तरण
पहुरा समाचाचरदाता
मसुरिया, १ चैत । कैलाली, गौरीगंगा नगरपालिका वडा नं ९ मसुरिया बजारमे प्रहरी पोष्ट हस्तान्तरण करल बा । वडा नं ९ कार्यालयके सहयोगमे मसुरिया बजार व्यवस्थापन समितिके समन्वयमे पोस्ट निर्माण हुइल हो ।
मुख्य बजारमे स्थापना करल प्रहरी पोष्टके कैलालीके प्रहरी नायब उपरीक्षक वेद प्रकाश जोशी उदघाटन करल रहिट । वडा अध्यक्ष हरिप्रसाद तिवारी ओ मसुरिया बजार व्यवस्थापन समितिके अध्यक्ष हरिप्रसाद जोशी उपरिक्षक जोशीहे ताला चाबी सहित प्रहरी पोष्ट हस्तान्तरण करले बटै ।
कैलालीमे लागुपदार्थके कारोबार प्रयोगसे सुरक्षा चुनौतीपुर्ण बन्टी गैल ओ घर–परिवारसे अपन किशोरावस्था ओ युवा छावाछाई उप्पर निगरानी नइकरटसम समाजमे शान्ति सुरक्षा कायम कैना चुनौतीपुर्ण रहल प्रहरी उपरीक्षक वेद प्रकाश जोशी बटैले बटै ।
मसुरिया बजारमे विगत कुछ समय यहोर लुटपाट चोरी ओ लागुपदार्थके कारोबार व्यापक रूपमे फैलल कहटी स्थानीयहुक्रे बजार क्षेत्रमे शान्ति सुरक्षा कायम कैना चौबिसै घण्टा प्रहरीके उपस्थिति हुइना करके पोष्ट माग करले रहिट ।
स्थानीय बासिन्दाके माग अनुसार बजारमे सुरक्षा चुनौतीपुर्ण बन्टी गैल अपनेफे महसुस करके सहयोग उपलब्ध कराइल वडा अध्यक्ष तिवारी बटैले बटै ।
नगरपालिकासे आश्वासन केल प्राप्त हुके बजारके व्यवसायीहुकनके मागहे सम्बोधन करटी वडा नं ९ के कार्यालयके सहयोगमे पोस्ट निर्माण हुइल मसुरिया बजार व्यवस्थापन समितिके अध्यक्ष हरि प्रसाद जोशी बटैलै ।
