सुदूरपश्चिम महोत्सव चैत १० गतेसे
पहुरा समाचारदाता
धनगढी १ चैत । सुदूरपश्चिम महोत्सवके १५औं संस्करण यिहे चैत १० गतेसे हुइना बा । कैलाली उद्योग वाणिज्य संघ मंगरके रोज पत्रकार सम्मेलनके आयोजना करके महोत्सव यिहे चैत १० से २० गतेसम आयोजना करे लागल संघके अध्यक्ष पुष्पराज कुवँर बटैलै ।
कोरोनाके कारण दुई वर्षसे स्थगित सुदूरपश्चिम महोत्सव यी बर्ष चैत १० गतेसे कैना उहाँ जनैलै । उहाँ कहलै, माघ १८ गते से आयोजना हुइना कहलेसेफे कोरोनाके संक्रमण बह्रे लागलपाछे तयारी सुरु हुइल सुदूरपश्चिम महोत्सव २०७८ अन्तिममे आके स्थगत करे परल रहे ।
धनगढी उपमहानगरपालिका–१ चौधरी बुक डिपो आघे रघुनाथनगर (पशुपति) तोलमे हुइना महोत्सव परिसरके मैदान सम्यइना ओ टेन्ट लगैना काम हुइटी रहल उहाँ जनैलै । सुदूरपश्चिम महोत्सवके १५ औँ संस्करणमे वृहत् व्यवसायीक कृषि प्रदर्शनी तथा प्रतियोगिता ताजा टिना ओ कृषिमे आइल प्रविधिसंगे मच्छी, केरा, पोल्ट्री, दुग्धजन्य पदार्थ, च्याउ आदी व्यवसायहे प्रदर्शनीमे विशेष जोड डेना पत्रकार सम्मेलनमे जानकारी डेहल रहे ।
यी सुदुरपश्चिम महोत्सव २०७८ मे कृषि, जडिवुटी, हस्तकला फर्निचर, अटोमोबाइल्स, गारमेन्ट, इलेक्टोनिकल, होटल ओ सुचना प्रविधि करके ३ सय स्टल रहना संघके वरिष्ठ उपाध्यक्ष पुष्कर ओझा बटैलै । यी वर्षके महोत्सवमे करिब ४ लाख व्यक्ति अवलोकन कैना उहाँ जनैलै ।
महोत्सवहे भव्यरुपमे सम्पन्न कैना मुल समितिसहित २३ ठो उप समिति रहना रहना उपाध्यक्ष ओझा जनैलै । महोत्सव विहान ११ बजेसे साँझ ८ बजेसम संचालन हुइना आयोजक जनैले बा ।
