केराखेतीसे विष्णुमती आत्मनिर्भर बन्टी

सागर कुस्मी
गुलरिया, ३ चैत । कञ्चनपुर जिल्लाके कृष्णपुर नगरपालिका वडा नम्बर ५ के विष्णुमती चौधरी सामाजिक व्यक्तित्व हुइँट् । सामाजिक काममे व्यस्त रलेसे फेन उहाँ मेहनत, लगनशील ओ इमान्दार अब्बल कृषक फेन हुइँट् । विष्णुमती उहाँक् गोसिया गोपीलाल चौधरी बिगत दुई बरससे अपने जमिनमे व्यावसायिक रुपमे केरा खेती करटी आइल बटैं । उहाँ केराके नयाँ प्रजाति ‘जिनाइन’ नामक केरा लगैले बटैं । केरा ९ से १२ महिनामे उत्पादन हुइठ् ।

वार्षिक डेढ लाख रुपैयाँ केराखेती करटी रहल उहाँ बटैठैं । केराखेतीमे सम्भावना बह्रटी रलेसे फेन संगे चुनौती फेन रहल उहाँक् भोगाइ बटिन । उपभोक्ता सीमावर्ती भारतीय केरा रुचैना हुइल ओरसे बजार व्यवस्थापनमे समस्या हुइल उहाँ बटैठैं । गैल बरस लकडाउनके कारण सीमानाका बन्द हुइल ओरसे अपन उत्पादन करल केरा मजा बजार पाइल उहाँ बटैठैं ।

केराखेती करेबेर वार्षिक १ लाखसम खर्च लग्ना ओ आम्दानी डेढ लाखसम हुइना विष्णुमती चौधरी बटैठैं । विष्णुमती बिगतमे अपने गाउँ घरमे बरस दिनसे काम करल हुइँट् । “घरसे दुर पराइ शहरमे दुःख करलसे व्यावसायिक रुपमे खेती करे सेक्लेसे मजा आम्दानी हुइना हुइलक् ओरसे केराखेती मजा व्यवसाय हुइ कहिके यहोंर लागल हुइटुँ,” विष्णुमती चौधरी बटैठैं ।

विष्णुमती फेन अपन तन, मन, धनसंगे लागल हुइँट् । उहाँ समाज सेवामे फेन सक्रिय बटैं । उहाँ अपन गाउँक् स्वयम्सेविका फेन हुइँट् । वहाँक् मेहनत ओ उत्पादन डेखके हमरे नेपाली फें मेहनत हुइल महशुस हुइल ओ नेपालमे कृषि तथा पर्यटनमे ढेर सम्भावना रहल ओरसे केराखेतीसे आत्मनिर्भर हुइ सेक्जाइ कना मनमे लागके केराखेती ओर जाँगर लागल उहाँ बटैठैं ।

अपन निजी लगानीसे शुरु करल केरा अझकल मजा उत्पादन आम्दानी फेन ढेर हुइना आश हुइल उहाँक् कहाइ बा । शुरुमे ८ कठ्ठामे केराखेती शुरु करल उहाँ यी बरस ८ कठ्ठा जमिन थप लेके १६ कठ्ठामे केरा खेती करटी बटैं ।

अपन उत्पादन करल केरा स्थानीय बजार गुलरिया, अत्तरिया, धनगढी बजार ओस्टके पहाड ओर विक्री हुइटी रहल उहाँ बटैलैं । उत्पादन केरा होलसेल ४० से ५० रुपियाँमे बेच्टी रहल उहाँ बटैलैं । उहाँके खेटी डेखके गाउँक् पुनीराम चौधरी फेन इहे पेशामे लागल बटैं । उहाँ वार्षिक ४ लाखसम आम्दानी हुइटी रहल बटैलैं ।

परम्परागत तरिकासे फे नयाँ प्रविधिसे खेती कैलेसे ढेर नाफा कमाइ सेक्ना विष्णुमतीके बटैठैं । ओइने दुनु जाने स्वरोजगार हइल नैहुइँट, १० जाने स्थानीय युवासमेत इहे काममे लागल बटैं । भारतमे होटेलमे भाडा मिस्ना काम करलसे अपने गाउँमे स्वरोजगार हुइल ओरसे खुशी हुइल बटैठैं । सरकार व्यावसायिक खेती करुइया किसाननके लाग विषेश प्याकेज लानके कृषक ओइन प्रोत्साहन ओ प्रवद्र्धन करे सेक्लेसे स्वदेशी उत्पादनमे बहुट जाने स्वरोजगार हुइ सेक्ना कृष्णपुर–५ के वडाध्यक्ष आशुराम चौधरी बटैलैं ।