एसपिएमे नबिल बैंकके सामाजिक उद्यमशीलता कार्यक्रम सञ्चालन
धनगढी, २ चैत । धनगढीके सुदूरपश्चिमाञ्चल एकेडेमी (एसपिए) मे सामाजिक उद्यमशीलता विकासके लाग नबिल सामाजिक उद्यमशिलता कार्यक्रम सञ्चालन हुइना हुइल बा ।
समाजमे उद्यमशीलताके माध्यमसे सामाजिक समस्याके दीर्घकालिन समाधान कैना नविन सोचमे आधारित उद्यमहे प्रबद्र्धन कैटी आर्थिक सामाजिक रुपान्तरणहे बढावा डेहक लाग इ कार्यक्रम शुरु करल एसपिए जनैले बा ।
कार्यक्रमअन्तर्गत ३ महिना अवधिके प्रशिक्षण बरसभर सञ्चालन करजैना बा । नबिल बैंकके सहकार्यमे सञ्चालन करजैना उ कार्यक्रममे सहभागी विद्यार्थीहे स्थानीय समुदायके सामाजिक उद्यम क्षमता ओ नेतृत्व विकासके लाग आवश्यक सिप तथा वित्तिय सहयोग उपलब्ध कराजैना बैंक जनैले बा ।
कार्यक्रम शुभारम्भ समारोहमे बोल्टी नबिल बैंकके सुदूरपश्चिम प्रदेश प्रबन्धक टेकराज भट्ट सुदूपश्चिम प्रदेशमे सुदूरपश्चिमाञ्चल एकेडेमीसँग सहकार्य कैके सामाजिक उद्यमके प्रबद्र्धन कैना उद्देश्यके साथ सामाजिक उद्यमशीलतामे प्रमाण पत्र कार्यक्रम सञ्चालन करजैना जानकारी डेलै ।
इ कार्यक्रमसे सात प्रदेशहे समेट्ना मेरके हरेक प्रदेशमे एकठो विश्वविद्यालय वा कलेजसँग सहकार्य कैके वार्षिक ७ सय विद्यार्थीहे सामाजिक उद्यमी बन्ना अवसर श्रृजना कैना उहाँ बटैलै ।
शुरुवाती चरणमे सामाजिक उद्यमशीलतामे प्रमाण पत्र कार्यक्रमहे कार्यान्वयनमे लन्ना बैंकसे सातु प्रदेशके स्कुल/कलेज तथा विश्व विद्यालयसँग सम्झौता करल जनैले बा । जौनमध्ये सुदूरपश्चिमसे सुदूरपश्चिमाञ्चल एकेडेमी छनौट हुइल हो ।
ओहकान अनुसार १८ बरस पुगल ओ त्रिभुवन विश्व विद्यालय अन्तर्गतके क्याम्पसमे अध्ययनरत वा अध्ययन करसेकल युवायुवती इ कार्यक्रममे सहभागी हुइ सेक्ना बाटै । कोर्स पुरा करल व्यक्ति उद्यमशीलताके स्पष्ट सोच विकास कैके नयाँ सामाजिक उद्यमके मोडेल विकास कैटी बैंकसे ऋण लेके सामाजिक उद्यम शुरुवात करे सेक्ना अपेक्षा लेहल नबिल बैंकके सुदूरपश्चिम प्रदेश प्रबन्धक भट्ट बटैलै ।
उहाँहुक्रे शिक्षा, स्वास्थ्य, पानी तथा सरसफाइ, कृषि, खाद्य, जीविकोपार्जन, उर्जा ओ जलवायु परिवर्तन जैसिन क्षेत्रमे लगानी कैके सामाजिक उद्यमशीलता विकास करे सेक्ना बैंक उल्लेख करले बा ।
सहभागिहुक्रे सामाजिक उद्यम संचालनके तरिका संगे आधारभूत कानूनी तथा कर सम्बन्धीके ज्ञान फेन पैना कार्यक्रम संयोजक प्रेमराज जोशी बटैलै ।
सहभागीहुक्रे सामाजिक समस्याके पहिचान तथा ओकर समाधानके तरिका, सामाजिक संजालमार्फत आपन व्यवसाय प्रबद्र्धन, लेखा सम्बन्धी ज्ञान, आवश्यक योजना तथा बजेट व्यवस्थापन जैसिन व्यवसाय संचालनके आधारभूत चीजके समेत व्यवहारिक ज्ञान ओ सीप पैना उहाँ बटैलै ।
विद्यार्थीनहे व्यवसाय केन्द्रित व्यवहारिक सीप डेनाके साथे आर्थिक श्रोतके सहयोग समेत डेना मेरके कार्यक्रम सञ्चालनके लाग नबिल बैंकसँग सहकार्य कैना अवसर पाइलमे गौरव अनुभूति हुइल सुदूरपश्चिमाञ्चल क्याम्पसके प्रमुख योगराज उपाध्याय बटैलै ।
लघु वित्त, संस्था व्यवस्थापन, परियोजना संचालन तथा व्यवस्थापन, प्रस्तुतिकला, आपन वस्तु तथा सेवाके बजारीकरण जैसिन विषयहे समेत तालिममे समावेश करल ओरसे इहीसे सयौं विद्यार्थी लाभ लेहे सेक्ना उहाँ जानकारी डेलै ।
‘इ तालिम व्यवसाय शुरुवात तथा संचालनमे किल सिमित नैहोके उद्यमीके व्यक्तित्व, नेतृत्व ओ विविध सीप विकाससंग समेत जोरल बा ।’ क्याम्पस प्रमुख उपाध्याय कहलै‘व्यवसाय संचालनके लाग आवश्यक सैद्धान्तिक तथा व्यवहारिक ज्ञानके साथे कर्जाके लाग समेत सहयोग कैना हुइल ओरसे इ कार्यक्रम लावा उद्यमीहे सफल ओ सक्षम बनैना रचनात्मक सहयोग पुग्ना बा ।’
नेपालके संविधानसे परिकल्पना करल हरेक नागरिकके आर्थिक, सामाजिक ओ समावेशी विकासके भावनाहे प्रबद्र्धन कैना इ कार्यक्रमसे निजि, सार्वजनिक, शैक्षिक संस्था ओ समुदायबीचके रचनात्मक सामूहिकताहे प्रबद्र्धन कैना प्रयास करल उहाँ बटैलै ।
दिगो विकास लक्ष्य, नेपालके पन्ध्रौं आवधिक योजना लगायतके दस्तावेजसे समेत प्राथमिकतामे राखके समावेशी विकासहे साकार पारक लाग इ मेरके कार्यक्रमसे सहयोग पुग्ना विश्वास फेन क्याम्पस प्रमुख उपाध्याय व्यक्त करले बाटै ।
इ कार्यक्रम पूर्ण व्यावसायिक चक्रके प्याकेज रहल ओरसे सामाजिक उद्यमके लाग अवधारणा निर्माण कैना, उहीहे लगानी योग्य बनैना तथा छोटसे छोट सिप ओ रोजगारी कैके जीवन निर्वाह करटी रहलहे फेन उद्यमी बनैना एक नयाँ शुरुवात हुइना कार्यक्रमके संयोजक प्रेमराज जोशी बटैलै । उहाँ सहभागी विद्यार्थीनके लाग विशेष छात्रवृतिके व्यवस्था समेत रहल जानकारी डेलै ।
