सुदूरपश्चिम स्पोर्टस अवार्डके टिसरा संस्करण चैत २५ गते

पहुरा समाचारदाता
धनगढी, ६ चैत । सुदूरपश्चिम स्पोर्टस अवार्ड’के टिसरा संस्करण चैत २५ गते हुइना बा । अँटवार नेपाल खेलकुद पत्रकार मञ्च कैलालीसे धनगढीमे पत्रकार सम्मेलन करटी अवार्डके टिसरा संस्करणबारे जानकारी डेहल हो ।

अवार्डके टिसरा संस्करणके तयारी सुरु हुसेकल खेलकुद पत्रकार मञ्च कैलालीके अध्यक्ष सीताराम ओझा बटैलै । ‘सुदूरपश्चिम स्पोर्टस अवार्डसे खेलकुदके माध्यमसे राष्ट्रके प्रतिष्ठा बढैना सफल तथा सम्भावना बोकल खेलाडी, प्रशिक्षक ओ खेलप्रेमीहुकनहे अइना दिनमे देशके नाम अन्तर्राष्ट्रिय स्तरमे चिन्हैना उत्प्रेरण प्रदान करटी आइल बा,’ उहाँ कहलै, ‘टिसरा संस्करणहे थप स्तरीय बनाइक लाग अभिनसे तयारी सुरु करले बटी ।’

उच्च प्रदर्शन करल राष्ट्रिय तथा अन्तर्राष्ट्रिय क्षेत्रमे सफल हुइल खेलाडी ओ प्रशिक्षक करके टमान ८ विधामे अवार्ड डेना अवार्डके संयोजक तथा खेलकुद पत्रकार मञ्च कैलालीके महासचिव प्रदीप पाठक बटैलै । उत्कृष्ट खेलाडी पुरुष ओ महिला, उत्कृष्ट प्रशिक्षक, वर्ष युवा खेलाडी, स्पेसल अवार्ड, लाइफ टाइम एचिभमेन्ट अवार्ड, सुदूरपश्चिम आइकन महिला ओ पुरुष विधामे अवार्ड प्रदान कैना पाठक बटैलै ।

उत्कृष्ट खेलाडी पुरुष ओ महिला विधाके विजेताहे ३५/३५ हजार, उत्कृष्ट प्रशिक्षकहे ३० हजार, वर्ष युवा खेलाडी, स्पेसल अवार्ड ओ लाइफ टाइम एचिभमेन्ट अवार्डके विजेताहे २५/२५ हजार नगदसे पुरस्कृत कैना खेलकुद पत्रकार मञ्चके कोषाध्यक्ष हरि जोशी बटैलै । ओस्टेक सुदूरपश्चिम आइकन महिला ओ पुरुष विधाके विजेताहे नगद २० हजारसहित ट्रफी, मेडल ओ प्रमाणपत्र प्रदान कैना आयोजक नेपाल खेलकुद पत्रकार मञ्च कैलाली जनैले बा ।

मुख्य प्रवर्द्धकमे सुदूरपश्चिम प्रदेश खेलकुद परिषद्

‘सुदूरपश्चिम स्पोर्टस अवार्ड’के टिसरा संस्करणमे सुदूरपश्चिम प्रदेश खेलकुद परिषदफे जोरल बा । अवार्डके मुख्य प्रवर्द्धकके रुपमे खेलकुद परिषद् जोरल मञ्चके अध्यक्ष ओझा बटैलै ।

अँटवारके रोज अध्यक्ष ओझा ओ प्रदेश खेलकुद परिषद्के सदस्य सचिव दीपकबहादुर सिंहबीच सम्झौता हुइल बा । सदस्य सचिव सिंह सरकारी स्तरबाट हुई पर्ना कार्यक्रम खेलकुद पत्रकार मञ्चसे करके यहाँके खेलाडी ओ प्रशिक्षकके मनोवल बढैना काम करल बटैलै । ‘तीन वर्षसे आयोजना हुइटी रहल अवार्ड खेलाडी ओ प्रशिक्षकके मनोवल बढैले बा,’ सिंह कहलै, ‘अवार्डमे जोरे पाके हम्रेफे खुसी बटी ।’