थारु महिलनहे ढकिया विन्ना तालिम

सागर कुस्मी
गुलरिया, ७ चैत । कंचनपुरके कृष्णपुर नगरपालिका वडा नम्बर ५ के थारु समुदायके महिला ढकिया बिन्ना तालिम कर्टी बटैं । वडा नम्बर ५ के आयोजना लक्षित कार्यक्रम अन्तर्गत स्थानीय २६ जाने महिला ढकिया बनैना सीप सिख्टी बटैं ।

तालिमके प्रशिक्षण गणेशी देवी चौधरी डेटि आइल बटि । उहाँ ढकिया, डेलुवा लगायतके सामान ओ थारु समुदायके पहिचान झल्कना सामान हेरैटी गैल बटैली । उहाँ कहली, थारु महिलनहे स्वरोजगार हुइक लाग इ तालिम वडा कार्यालयसे संचालन हुइल बटैली ।

पाछेक पुस्टा ढकिया, डेलुवा बिन्ना रुचि नै हुइल ओर्से थारु महिलनहे अइसिन सीप मुलक काम लानल वडा अध्यक्ष आशुराम चौधरी बटैलैं । उहाँ कहलैं, हरेक समुदायके महिलन हे लक्ष्य कैके सीप मुलक काम डेटि आइल बटि उहाँ बटैलैं । अब्वे इ ताकिम वडासे १ लाखके बजेतमे संचालन हुइटी रहल जानकारी डेलैं । थारु समुदायमे ढकिया डेलुवाके बहुत ढेर महत्व बा ।

भोजभटेर, मर्नीकर्नी, टरटिहुवार लगायत प्राय सक्कु काममे ढकिया ओ डेलुवा अनिवार्य रुपमे काम लग्ना प्रशिक्षार्थी विष्णुमति चौधरी बटैली । ४० वर्षीय विष्णुमति कहली, सब ठाँउमे आवश्यक पर्ना ढकिया, बिने सिखे खोजले से फे सिखुइया मनैं नैपाके सिखे नै सेकल बटैली । आब इहे अवसर मे सिख्ना मौका मिलल ओर्से खुसी लागल उहाँ बटैली ।

डोसर प्रशिक्षार्थी दर्शना चौधरी, लोप हुइटी रहल हमार सँस्कृति जोगाइक लाग अब्बे ढकिया बिन्ना सीप सिख्टी रहल बटैली । उहाँ कहली, अझकलिक लर्का स्कुल जैठैं मने अओअन संस्कृति बचैना मट्लब नैरहल बटैली ।

स्कुलमे अपन सँस्कृतिके जर्गेना कैना खालको पर्हाइ नै हुइना उहाँ अपन पिर बटैली । ढकिया डेलुवा बिन्ना सीप सिख्के आत्म निर्भर हुइक लाग अइसिन मेर्के तालिम डेहक वडा अध्यक्ष आशुराम चौधरी बटैलैं ।

उहाँक् अन्सार अब्बे इ ५ नम्बर वडासे बेंटबाँस, सिलाइ कटाइ फेन तालिम डेटि रहल बटैलैं । उहाँ कलैं, ढकिया बिन्ना तालिमके लाग एक लाख, बेंटबाँसके एक लाख, किटनाशकके लाग एक लाख, सिलाइ कटाइके लाग ३ लाख, बेमौसमी टिना खेटीके लाग ३ लाख रकम छुट्याइल बटैलैं । ओस्टेके भलमन्सा ओइनके लाग वार्षिक कार्य योजना तालिम फे डेहल अध्यक्ष चौधरी कहलैं । ५ नम्बर वडासे दस गाउँक भलमन्सा ओइन तालिम डेके हरेक गाउँमे १५÷१५ ठान कुर्सी, एक्ठो डराज ओ फाइल कलम फेन निशुल्क डेहल जानकारी डैलैं ।

दलित समुदायके महिलनके लाग बेँटबाँस तालिम हुइटी बा । जेम्ने दलित समुदाय से २० जाने सहभागी हुइल बटैं । इ तालिम भोसा खुना डेटी बटैं । इ तालिम लेके स्वरोजगार हुइ सेक्ना प्रशिक्षार्थी जानकी वड बटैली ।

ओस्टेके लक्षित कार्यक्रम अन्तर्गत बेमौसमी टिना खेटी १५ दिने तालिममे २० जाने, किटनाशक औषधी बनैना १० दिने तालिममे २५ जाने, केराके परिकार बनैना १५ दिने तालिममे २० जाने, सिलाइ कटाइ ३ महिनेमे ६० जाने, मुडा बनैनामे २० जाने ओ ढकिया बनैनामे २६ जाने सहभागी रहल अध्यक्ष चौधरी कहलैं ।

कृष्णपुर नगरपालिका ५ नम्बर वडा कार्यालय से सपसे ढेर ओ स्वरोजगार मुलक तालिम डेहल अध्यक्ष आशुराम चौधरी बटैलैं । तालिम लेके स्वरोजगार हुइ सेक्ना बिस्वास रहल विष्णुमती चौधरी बटैली ।