यु–१९ महिला राष्ट्रिय क्रिकेटः सुदूरपश्चिम ओ कर्णाली प्रदेश विजयी

पहुरा समाचारदाता
धनगढी, ७ चैत । कैलालीको धनगढीमे जारी मुख्यमन्त्री कप यु–१९ महिला राष्ट्रिय क्रिकेट प्रतियोगिता अन्तर्गत सोम्मार हुइल दुई खेलमे सुदूरपश्चिम ओ कर्णाली प्रदेश विजयी हुइल बटै । पहिल खेलमे सुदूरपश्चिमसे लुम्बिनी प्रदेशहे ६ विकेटसे पराजित करल ।

टस जिटके ब्याटिङ कैना निर्णय करल लुम्बिनीसे निर्धारित २० ओभरमे ५ विकेट गुमाके १ सय ७ रन बनाइल । १ सय ८ रनके विजयी लक्ष्यसहित जवाफी ब्याटिङ सुरु करल सुदूरपश्चिम १७.४ ओभरमे ४ विकेट गुमाके लक्ष्य भेटाइल । सुदूरपश्चिमहे जिटैना मनिषा चौधरी ओ यशोदा विष्ट ६३ रनके अविजित साझेदारी करली । सुदूरपश्चिमके लाग मनिषा व्यक्तिगत ३०, अनु कठायत २७ ओ यशोदासे ११ रन बनैली । बलिङओर लुम्बिनीके शुस्मिता भुसाल १ विकट लेली ।

उ आघे पहिल इनिङमे लुम्बिनीके जिज्ञासा थापा ३२, रन्जु श्रेष्ठ २५, आस्मा पुलामी मगर १६ ओ यमुना थारु अविजित १५ रन बनैली । बलिङ ओर सुदूरपश्चिमके मनिषा चौधरी, जानकी थापा ओ स्नेहा महरा समान १÷१ विकेट लेली । खेलके प्लेयर अफदी म्याच सुदूरपश्चिमके मनिषा घोषित हुइली ।

दुसर खेलमे कर्णाली प्रदेशसे बागमती प्रदेशहे ९ विकेटसे पराजित करल । टस जिटके ब्याटिङके लाग मैदानमे उटरल बागमती २० ओभरमे ७ विकेट गुमाके ६७ रन केल बनाई सेकल । ६८ रनके विजयी लक्ष्य पछ्यइल कर्णाली १२.२ ओभरके १ विकेट गुमाके लक्ष्य भेट्टाइल । कर्णालीके जितमे तिर्सना विश्वकर्मा अविजित २२ रन बनैली । ओकर लाग किरण कुमारी कुँवर १७ रन बनाके रन आउट हुई पुग्ली ।

उ आघे बागमतीके लाग हेलिसा गुरुङ अविजित ३४ रन बनैना बाहेक और ब्याटरके प्रदर्शन सम्झन लायक बने नइसेकल । बलिङओर कर्णालीके एन्जिला थापा ओ विना थापा समान २÷२ तथा श्रीमासिं थारु ओ तिर्सना विश्वकर्मा समान १÷१ विकेट लेली । खेलके प्लेयर आफदी म्याच तिर्सना चुन्ली ।

नेपाल क्रिकेट संघ (क्यान) के आयोजनामे जारी प्रतियोगिताके विजेता टिम पाँच लाख ओ दुसर हुइल तीन लाख नगदसहित ट्रफि, मेडल ओ प्रमाणपत्र प्राप्त करही । प्रतियोगितामे ७ प्रदेशके सात १९ वर्ष टरेक महिला राष्ट्रिय क्रिकेट टिमके खेलाडीके सहभागिता रहल संघके प्रदेश अध्यक्ष हरि रेग्मी बटैलै । ११ गतेसम चल्न प्रतियोगिताके प्रवर्द्धक सुदूरपश्चिम प्रदेश खेलकुद परिषद् रहल बा ।