सुदूरपश्चिम महोत्सवके १५ औं संस्करण सुरु

पहुरा समाचारदाता
धनगढी, ९ चैत । ‘सुदूरपश्चिम समृद्धिके लागः आर्थिक समृद्धि’ नारासहित विफेक रोजसे धनगढी–१ स्थित पशुपति टोलमे सुदूरपश्चिम महोत्सवके १५ औं संस्करण सुरु हुइल बा । कैलाली उद्योग वाणिज्य संघके आयोजनामे सुरु हुइल महोत्सवके सुदूरपश्चिम प्रदेशके मुख्यमन्त्री त्रिलोचन भट्ट एक समारोहके बीच उद्घाटन करले बटैं ।

महोत्सवके उद्घाटन करटी मुख्यमन्त्री भट्ट सुदूरपश्मि प्रदेशके आथिएक समृद्धि ओ विकासके लाग अइसिन मेरिक मेला महोत्सवसे टेवा पुग्ना बटैलैं । उहाँ निजी क्षेत्रसँग समन्वय कैके सुदूरपश्चिम प्रदेश विकासके लाग प्रदेश सरकार सहयोग करना बटैलैं । “प्रदेश सरकार सम्बोधन करे सेक्ना माग प्रदेश सरकार सम्बोधन करि,” उहाँ कलैं, “संघीय सरकारसे हुइ सेक्ना बाहेक प्रदेश सरकारसे हुइसेक्ना माग प्रदेश सरकार पूरा करना तयार बा ।” उहाँ कैलाली उद्योग वाणिज्य संघसे करल एकठो प्रदर्शनी स्थलके माग प्रदेश सरकार पूरा प्रतिवद्धता फेन जनैलै ।

सुदूरपश्चिम प्रदेशके सभामुख अर्जुनबहादुर थापा सुदूरपश्चिममे रहल पर्यटन, कला, संस्कृति, कृषि, उद्योगलगायतके क्षेत्रके प्रवद्र्धन करलेसे प्रदेशके समृद्धि हुइना बटैलैं । उहाँ पर्यटकहे आकर्षण करना ओ यी क्षेत्रमे पर्यटकके बसाइ लम्बइना कार्यक्रम नाने परनामे जोर डेलैं । उहाँ युवा जनशक्ति विदेश पलायन होके विकासमे अवरोध हुइल बटैलैं ।

कार्यक्रममे उद्योग, पर्यटन, वन तथा वातावरणमन्त्री मानबहादुर धामी यी महोत्सव निजी क्षेत्र सक्रिय हुइ लागल कना संकेत करल बटैलैं । “कोरोना महामारीले थला परल निजी व्यवसाय आब सक्रिय रूपमे अपन व्यापार व्यवसाय सुरु करटा,” उहाँ कलैं, “आब कुछ समयमे धरासयीमे परल व्यापार व्यवसायी टंग्रना क्रम सुरु हुइ ।”

ओस्टेक, कार्यक्रममे आन्तरिक मामिला तथा कानूनमन्त्री पूर्णा जोशी अइसिन मेला महोत्सवमे स्थानीय उत्पादनहे महत्वपूर्ण रूपमे प्रवद्र्धन करे परना बटैलि । उहाँ मेला महोत्सवमे स्थानीय उत्पादनके विक्रीवितरणके अवसरके रूपमे लेहे परना बटैलि । उहाँ मुलुकके अर्थतन्त्र सुधारके लाग कुछ बाझल कानून फेन सुधार करेपरना बटैलि । व्यवसाय हुकनके हकहितके लाग प्रदेश सरकार एकडम सकारात्मक रहल उहाँक कहाइ रहे ।

नेपाल उद्यागे वाािण्ज्य महासंघके पूर्व अध्यक्ष चण्डीराज ढकाल निजी क्षेत्र समृद्ध नैहुइटसम देश विकास नैहुइ सेक्ना बटैलैं । उहाँ निजी क्षेत्र देश आर्थिक विकासमे किल नैहोके रोजगारी फेन सिर्जना करल बटैलैं । ओस्टेक, कार्यक्रममे उद्यागे वाािण्ज्य संघ काठमाडौं नगर उपाध्यक्ष दिनेश श्रेष्ठ कोरोनाके कारण दुई वर्षसम थला परल निजी व्यवसाय आब भर्खर चलायमान हुइ लागल बटैलैं ।

कार्यक्रममे कैलाली उद्योग वाणिज्य संघके कानूनी सल्लाहकार वीरबहादुर जेठारा, धनगढी उपमहानगरपालिका प्रमुख नृपबहादुर वड, शिक्षाविद् डा. हेमराज पन्तलगायत मन्तव्य व्यक्त करले रहैं ।

भौतिक पूर्वाधार विकासमन्त्री चुनकुमारी चौधरीके अध्यक्षतामे हुइल कार्यक्रममे स्वागत कैलाली उद्योग वाणिज्य संघके अध्यक्ष पुष्पराज कुवँर करले रहैं ।

महोत्सवमे गायिका रेखा जोशी, मोडेल प्रियंका कुँवर, कमेडियन राजाराजेन्द्र पोखरेल ओ थारु सखिया नाच ओ दार्चुलाके छलिया नाचके झाँकी फेन के प्रस्तुत हुइल रहे ।

सुदूरपश्चिम प्रदेशके पर्यटन, कृषि ओ उद्योग व्यापारके विकास तथा विस्तारके साथे संस्कृति ओ कलाके प्रवद्र्धनके महोत्सवके आयोजना करल कैलाली उद्योग वाणिज्य संघके अध्यक्ष पुष्पराज कुवँर बटैलै ।

महोत्सवमे स्थानीय उत्पादन, महिला उद्यमीहे प्रोत्साहन करल बा । कलेसे कृषि, जडिवुटी, हस्तकला, फर्निचर, अटोमोवाइल्स, गारमेन्ट, इलेक्टोनिकल, होटल ओ सूचना प्रविधि करके २५० जटरा संख्याके स्टलके सहभागिता बा ।

सास्कृतिक रुपमे धनी सुदूरपश्चिमके कला संस्कृतिके संरक्षणसंगे विगतके दिनमे महोत्सवसे उत्पादन करल कलाकारहुक्रे जैसिक देश विदेशमे ख्याती कमैले बटै उहे कार्यहे निरन्तता डेटी यी क्षेत्रके कला संस्कृतिमे सम्भावना रहल ओ योगदान डेहल कलाकारहुकनहे स्टेजमे प्राथमिकता डेहल बा ।

महोत्सवमे यी क्षेत्रके उद्यमी व्यवसाय उत्पादनहे प्राथमिकता डेजैना कलेसे नेपाल अधिराज्यसे अइना उद्योगी व्यवसायीहुकनहे सम्मानित रुपमे सहभागिता करैना कहल बा । सुदूरपश्चिमके परिकार सहितके महोत्सव स्थलमे खाना खाजाके स्टल रहल बा । जेकर सरसफाइ तथा उत्कृष्ट व्यवस्थापनके लाग होटल व्यवसायी संघसंग समन्वय करले बा ।

अनुमानित २ करोडके लगानीमे हुइटी रहल महोत्सव उद्योगी व्यवसायके १० करोड वरावरके कारोवार हुइना अनुमान करल बा । कलेसे यी वर्षके महोत्सवमे करिब ४ लाख व्यक्तिसे अवलोकन कैना अनुमानफे करल आयोजक जनैले बा । महोत्सवहे भव्यरूपमे सम्पन्न कैना मुल समिति सहित २१ उपसमिति रहल बा ।

सुरक्षाके दृष्ट्रिकोणसे पूर्णरूपमे अत्याधुनिक सिसि क्यामरासे निरिक्षण करजैना बा कलेसे नीजि ओ सरकारी सुरक्षाकर्मीके व्यवस्था करल बा । पहिलेक से फरक ठाउँमे रहल ओरसे सुरक्षा निकायमे सुरक्षा व्यवस्थाहे चुस्त कराडेना ओ मौसमके चुनौती रहल ओरसे नगरप्रमुख मार्फत विपदके लाग सजक ओ सचेत हुके दमकल लगाएत सुरक्षा सामग्रीसहित तयारी अवस्थामे जनशक्ति व्यवस्थापन करल बा । महोत्सवमे भारतके चर्चित रमाइलो मेलाफे रहल बा ।