एपीएफ ओ गण्डकी सेमिफाइनलमे
पहुरा समाचारदाता
धनगढी, १० चैत । कैलालीके धनगढीमे जारी ‘मुख्यमन्त्री कप राष्ट्रिय पुरुष भलिबल प्रतियोगिता’के सेमिफाइनल समिकरण पूरा हुइल बा । बिफेक रोज क्वाटरफाइनलके दुई खेल हुइलसंगे सेमिफाइनल पुगल चार टिमके टुंगो लागल हो ।
विभागिय टोली एपीएफ ओ घरेलु टोली सुदूरपश्चिमबीच बिफेक रोज हुइल क्वाटरफाइनलके खेलमे एपीएफ विजयी हुइल बा । सुदूरपश्चिम प्रदेशहे ३–० के सोझे सेटले पराजित करटि एपीएफ सेमिफाइनलमे स्थान सुरक्षित करल हो । एपीएफ सुदूरपश्चिमहे २५–१३, २५–२० ओ २५–१२ के सेटसे पराजित करल हो । खेलके म्यान अफ द म्याच एपीएफके टेकराज अवस्थी बन्लैं ।
ओस्टेक, बिफके रोज हुइल अन्तिम क्वाटरफाइनलके खेलमे गण्डकी प्रदेश बागमती प्रदेशहे ३–० के सोझे सेटले पराजित करटि सेमिफाइनलमे स्थान बनैले बा । गण्डकी बागमतीहे २५–१५, २५–१४ ओ २५–१८ के सेटसे पराजित करल हो । खेलके म्यान अफ द म्याच गण्डकी प्रदेशके हरि पाण्डेय बन्लैं ।
सेमिफाइनलके दुई खेल काल्ह (शुकके रोज) हुइ । फाइनल प्रवेशके लाग त्रिभुवन आर्मी क्लब ओ एपीएफ तथा नेपाल पुलिस क्लब ओ गण्डकीबीच खेल हुइना आयोजक सुदूरपश्चिम प्रदेश खेलकुद परिषद् जनैले बा ।
१२ गतेसम सञ्चालन हुइना प्रतियोगिताके विजेता नगद चार लाख, उपविजेता दुई लाख, तेसर हुइल टोली एक लाख ओ चौठा स्थान प्राप्त करल टिम ५० हजार नगदसहित ट्रफी ओ मेडल प्राप्त करि ।
प्रतियोगिताके सर्वोत्कृष्ट खेलाडीहे नगद २० हजार तथा उदयमान खेलाडी, उत्कृष्ट लिफ्टर, उत्कृष्ट स्पाइकर, उत्कृष्ट ब्लकर, उत्कृष्ट डिफेन्सर, उत्कृष्ट सर्वर ओ उत्कृष्ट प्रशिक्षकहे जनही १० हजारसहित पुरस्कृत करजाइ । प्रत्येक खेलके म्यान अफ द म्याचहे नगद एक हजार पाँच सय नगदसहित पुरस्कृत करजाइ ।
