सेजनसे पत्रकारहुकनहे अभिमुखीकरण
पहुरा समाचारदाता
धनगढी, ११ चैत । नेपाल आर्थिक पत्रकार समाज (सेजन) से कैलालीके पत्रकारहुकनहे आर्थिक तथा वित्तीय व्यवस्थानपके बारेमे अभिमुखीकरण करले बा ।
शुकके धनगढीमे सार्वजनिक खर्च तथा वित्तीय उत्तरदायित्व सचिवालयके सहकार्यमे कार्यक्रम करल हो । सुदूरपश्चिम आर्थिक मामिला तथा योजना मन्त्री तारालामा तामाङके वडका पहुनामे हुइल कार्यक्रममे उहाँ सरकारसे आर्थिक अनुशासन कायम करल नइकरल विषयमे कलम चलैना पत्रकारहुकनहे आग्रह करले बटै । उहाँ सरकारसे आर्थिक अनुशासन अनुसार काम करले बा की नाई ओकर निगरानी करे पर्ना सुझैलै ।
उहाँ सरकारके आर्थिक क्रियाकलापके विषयमे पत्रकारहुकनहे निर्धक्क हुके कलम चलैनाफे आग्रह करलै । ‘सरकारसे आर्थिक रुपमे अनुशासन कायम करके नेगल बा की नइहो कहिके अपनेहुक्रे कलम चलाई ।
यम्ने हम्रे सहकार्य कैना तयार बटी उहाँ कहलै ‘हम्रे जे जहाँ हुइलेसेफे जनताके लाग काम करटी रहल ओरसे सक्कु जे एक आपसमे सहकार्य करके आघे जाई ।’ उहाँ तालिमसे आर्थिक क्षेत्रमे कलम चलैटी रहल पत्रकारहे थप सहयोग पुग्न विश्वास व्यक्त करलै ।
‘तालिम पश्चात सुदूरपश्चिम सरकारसे करल कामके बारेमे यहाँहुक्रे कलम चलैबी’ उहाँ कहलै, ‘सेजनके अध्यक्ष जनार्दन बरालके अध्यक्षतामे हुइल कार्यक्रममे पेफाके सचिवालय सदस्य सचिव गोरखबहादुर शाही, सुदूरपश्चिम प्रदेश सरकारके आर्थिक मामिला तथा योजना मन्त्रालयके प्रदेश सचिव जितेन्द्र बस्नेत, नागरिक दैनिकके समाचार प्रमुख बालकृण ज्ञवाली लगायत तालिममे सहजीकरण करल हुइट ।
सेजन ओ सार्वजनिक खर्च तथा वित्तीय उत्तरदायित्व सचिवालयसंगके सहकार्यमे एक दिन आर्थिक पत्रकारहुकनहे पेफा ओ सार्वजनिक वित्त व्यवस्थापन सम्बन्धी तालिम डेहल हो ।
कार्यक्रममे कैलालीके टमान सञ्चारमाध्याममे कार्यरत पत्रकारहुकनके सहभागिता रहल रहे ।
