स्वास्थ्य क्लिनिकके नवनिर्मित भवन उद्घाटन

पहुरा समाचारदाता
धनगढी, १४ चैत । धनगढीमा नवनिर्मित शहरी स्वास्थ्य प्रवद्र्धन केन्द्र साप्ताहिक स्वास्थ्य क्लिनिकके भवन उदघाटन करल बा ।

धनगढी उपमहानगरपालिका–७, देवहरियामे नवनिर्मित साप्ताहिक स्वास्थ्य क्लिनिकके भवन नगर प्रमुख नृपबहादुर वड उदघाटन करलै । यी संगे धनगढी उपमहानगरपालिकासे १७ वडामे अपने भवनमार्फत सेवा सुचारु कैना सफल हुइल बा । स्थानीय तहके निर्वाचनआघे उपमहानगरपालिकामे तीन वडा बाहेक औरमे अपने भवन नइरहे ।

धनगढी उपमहानगरपालिकाके नगर प्रमुख नृपबहादुर वड पहिले उदघाटनके तयारी हुइलेसेफे टमान कारणसे उदघाटन हुइ नइसेकल बटैलै । ‘हम्रे अइना आघे तीन वडामे केल भवन रहे,’ नगर प्रमुख वड कहलै, ‘अब्बेक १७ वडामे हमार अपने स्वास्थ्य कार्यालय बा । दुई वडामे भर जमिनके समस्याके कारण भवन बनाई सेकल नइहो ।’

सहरी स्वास्थ्य प्रवद्र्धन केन्द्र बेलीके इन्चार्ज डाक्टर सिद्धराज आचार्य क्लिनिकसे खोप, गाउँघर क्लिनिक, जेष्ठ नागरिक क्लिनिक, गर्भवतीलगायतके जाँचसंगे औषधि उपलब्ध करैना बटैलै । ‘क्लिनिक हमरे शाखा अन्तर्गत परठ,’ डाक्टर आचार्य कहलै, ‘उहाँसे स्वास्थ्यकर्मी नियमित खटाके हम्रे यहाँफे स्तरीय स्वास्थ्य सेवा डेबी ।’