हिमशिखर सहकारी मोबाइल बैंकिङ तथा एसएमएस सेवा सुुरु
पहुरा समाचारदाता
धनगढी, १४ चैत । हिमशिखर बहुउद्देश्यीय सहकारी संस्था लिमिटेडसे मोबाइल बैंकिङ तथा एसएमएस सेवा सुुरु करले बा ।
सोम्मारके रोज धनगढीमे पत्रकार सम्मेलनके आयोजना करके मोबाइल बैंकिङ तथा एसएमएस सेवा सुुरु उ सहकारीके अध्यक्ष दुर्गाप्रसाद भण्डारी बटैलै ।
अध्यक्ष भण्डारी सहकारीेसे डेना सुविधाबारे जानकरी डेटी अपन खातामे रहल पैसा प्रत्यक्ष रुपकमे हेरे मिल्ना, मिनी स्टेटमेन्ट हेरे मिल्ना, हिमशिखर सहकारीके एक खातासे दुसर खातामे पैसा ट्रान्सफर करे मिल्ना। बैंक तथा फाइनान्समे पैसा ट्रान्सफर करे मिल्ना, फोन रिचार्ज करे मिल्ना सेवा प्रदान सुरु करल बटैलै ।
ओस्टेक करके ल्याण्डलाइन विल भुक्तानी, इन्टरनेट विल, भुक्तानी, बत्तीके विल भुक्तानी, खानेपानीके विल भुक्तानी, स्मार्ट टिभी रिचार्ज, हवाई टिकट काटे मिल्ना, खल्ती एपमे पैसा लोड करे मिल्ना ओ क्यूआर कोड स्केन करे मिल्ल्ना सेवाफे सुचारु करल अध्यक्ष भण्डारी बटैलै । उहाँ अइना दिनमे एटिएम सेवाफे सुचारु कैना बटैलै ।
सहकारी दिवसके अवसरमे यिहे चैत २० गते उहाँ आर्थिक समृद्धिमे सहकारीके भूमिका विषयक विद्यालय स्तरीय वक्तृत्व प्रतियोगिताके आयोजना कैना ओ पहिलहे १० हजार, दुसरा हुइलहे ७ हजार, तिसरा हुइलहे ५ हजार ओ सन्त्वानाहे ३ हजार नगद पुरस्कारके व्यवस्था करल सहकारीके अध्यक्ष भण्डारी बटैलै ।
सहकारीके प्रबन्धक महेन्द्र शाही २०६५ सालमे स्थापना हुइल संस्थामे अब्बे ३४ सय ३८ जाने शेयर सदस्य रहल ओ फागुनसम २ करोड ९७ लाख ५९ हजार ५०० शेयर पुँजी रहल बटैलै । ओस्टेक ऋण लगानी ५५ करोड ४९ लाख ६४ हजार १८८ रुप्या, बचत/निक्षेप ४१ करोड ३६ लाख ३७ हजार ८७८.९० रुप्या ओ कुल सम्पति ६८ करोड ९७ लाख ८६ हजार ८६० रुप्या रहल प्रवन्धक शाही बटैलै ।
धनगढी–५ तारानगरमे प्रधान कार्यालय रहल सहकारीके सेवा केन्द्र हसुलिया ओ अत्तरियामे रहल बा । सहकारीके कार्यक्षेत्र धनगढी उपमहानगरपालिका, गौरीगंगा नगरपालिका, कैलारी गाउँपालिका ओ गोदावरी नगरपालिका रहल जनागिल बा ।
