वर्ष पुरुष खेलाडीहे मास ह्युमन रिर्सोसेजके साथ
पहुरा समाचारदाता
धनगढी, १५ चैत । टिसरा सुदूरपश्चिम स्पोर्टस अवार्ड २०७८’ हे काठमाण्डौंके मास ह्युमन रिर्सोसेजसे प्रायोजन करले बा । काठमाण्डौंके सामाखुसीमे रहल मास ह्युमन रिर्सोसेजसे अवार्डके बर्ष पुरुष खेलाडी विधाहे प्रायोजन करल हो ।
नेपाल खेलकुद पत्रकार मञ्च कैलालीके आयोजनामे हुइना अवार्डमे मास ह्युमन रिर्सोसेज जोरल हो । नेपाल खेलकुद पत्रकार मञ्च कैलालीके अध्यक्ष सीताराम ओझा ओ मास ह्युमन रिर्सोसेजके अध्यक्ष एकेन्द्र कुँवर बीच प्रायोजन सम्झौता पत्रमे हस्ताक्षर करले बटै । कुँवर राष्ट्रिय खेलकुद परिषद्के कार्यकारी बोर्ड सदस्य रहल बटै । उहाँ टमान संघ संस्थामे फे आवद्ध रहटी आइल बटै ।
नम्मा समयसे खेलकुद क्षेत्रमे आबद्ध रहटी आइलमे अपने क्षेत्रमे हुइना अवार्डमे सहभागी हुइ पाके बहुट खुशी लागल कुँवर बटैली । उहाँ अइना दिनमेफे अवार्डहे साथ डेना प्रतिबद्धता जनैलै ।
अवार्डके टिसरा संस्करणके तयारी सुरु हुइल बा । उच्च प्रदर्शन करल राष्ट्रिय तथा अन्तर्राष्ट्रिय क्षेत्रमे सफल हुइल खेलाडी ओ प्रशिक्षक करके टमान ८ विधामे अवार्ड डेना बा । उत्कृष्ट खेलाडी पुरुष ओ महिला, उत्कृष्ट प्रशिक्षक, वर्ष युवा खेलाडी, स्पेसल अवार्ड, लाइफ टाइम एचिभमेन्ट अवार्ड, सुदूरपश्चिम आइकन महिला ओ पुरुष विधामे अवार्ड प्रदान कैजाई ।
उत्कृष्ट खेलाडी पुरुष ओ महिला विधाके विजेताहे ३५/३५ हजार, उत्कृष्ट प्रशिक्षकहे ३० हजार, वर्ष युवा खेलाडी, स्पेसल अवार्ड ओ लाइफ टाइम एचिभमेन्ट अवार्डके विजेताहे २५/२५ हजार नगदसे पुरस्कृत कैना आयोजक नेपाल खेलकुद पत्रकार मञ्च कैलाली जनैले बा । ओइने सुदूरपश्चिम आइकन महिला ओ पुरुष विधाके विजेताहे नगद २० हजार सहित ट्रफी, मेडल ओ प्रमाणपत्र प्रदान करजाई ।
‘सुदूरपश्चिम स्पोर्टस अवार्ड’के टिसरा संस्करणके मुख्य प्रबद्र्धक्कमे सुदूरपश्चिम प्रदेश खेलकुद परिषद् रहल बा ।
